پولیس اور بی ایم سی سے شکایت کی کہ ہوٹل اور زائرین کے ذریعے ملنے والے کھانے کے پیکٹ سڑکوں پر پھینک دیتے ہیں اوردیررات تک لڑائی جھگڑا کرتے ہیں۔

ماہم درگاہ کے اطراف رہنے والے افراد بھکاریوں کی بڑھتی تعداد ہی سے نہیں بلکہ ہوٹل اور زائرین کے ذریعہ ملنے والے کھانے اور کھانا کھا کر  گلیوں اور سڑکوں پر گندگی کرنے  نیز دیر رات تک ایک دوسرے سے لڑتے رہنے بھکاریوں سے سخت  پریشان ہیں ۔ ماہم پولیس کی بارہا کارروائیوں کے باوجود بھکاریوں کی تعداد کم تو نہیں ہورہی ہے اورنہ ہی مکینوں کی پریشانیوں کا کوئی مستقل حل نکالا جارہا ہے۔ اس سلسلہ میں ماہم کے مکینو ںنے مخدوم شاہ ماہمی کی درگاہ ،کیڈل روڈ پر بھکاریوں کے بڑھتے مسائل ، گندگی اور ان کے جھگڑے سے نجات دلانے کے لئے بی ایم سی کمشنر بھوشن گگرانی اور جی نارتھ وارڈ کے اسسٹنٹ میونسپل کمشنر کو مکتوب روانہ کیا ہے اور اس مسئلہ کو ختم کرنے کی اپیل کی ہے۔   ماہم کے مکینو ںکی جانب سے سماجی رضا کار فاروق ڈھالا اور عرفان مچھی والا نے بی ایم سی کمشنر اور ماہم جی نارتھ کے اسسٹنٹ میونسپل کمشنر کوای میل کے ذریعہ بھیجے گئے شکایتی مکتوب میں بتایا کہ مخدو م شاہ ماہمی کی درگاہ کے اطراف ایک طرف جہاں زائرین بڑی تعداد میں زیارت کے لئے آتے ہیں اور اکثر و بیشتر زائرین وہاں موجود غریبوں کو کھانا کھلاتے ہیں۔  یہی وجہ ہےکہ یہاں نہ صرف دن بہ دن بھکاریوں کی تعداد میں اضافہ ہورہا ہے بلکہ ان کی وجہ سے علاقے میں سڑکوں اور گلیوں میں گندگی کا انبار لگ رہا ہے جس سے یقینی طو رپر یہاں کے مکینوں کی صحت بری طرح متاثر ہورہی ہے۔ یہاں آنے والے زائرین بھکاریوں کو کھانے کاجوپیکٹ دیتے ہیں،وہ  پیکٹ کا کھانا کھاکر یا اسے ادھورا سڑک اور گلیوں میں پھینک کر فٹ پاتھوں پر ڈیرا ڈالے رہتے ہیں ۔اس ضمن میں نامہ نگار سے بات چیت کرتے ہوئے فاروق ڈھالا نے مزیدبتایا کہ یہاں کے  مکین بھکاریوںکے ذریعہ کی جانے والے گندگی   ہی سے نہیں بلکہ ان کے جھگڑے سے بھی پریشان ہیں ۔ فاروق مچھی والا کا کہنا ہے کہ اکثر فٹ پاتھوں پر قبضہ کرکے دیر رات تک شراب پی کربھکاری شب ۳؍ اور ۴؍ بجے تک آپس میں لڑتے ہیں اورگندی گالیاں دیتے ہیں۔یہی وجہ ہے کہ اس سلسلہ میں پولیس کے ساتھ ساتھ بی ایم سی کمشنر اور ماہم جی نارتھ کے اسسٹنٹ میونسپل کمشنر کو بھی شکایتی مکتوب روانہ کیا گیا ہے۔ 
اس سلسلہ میں جی نارتھ وارڈ کے سالیڈ ویسٹ مینجمنٹ ڈپارٹمنٹ نے ماہم کے مکینوں سے  ملنے والی شکایت پر خود ماہم درگاہ اور اس کے اطراف بالمیا لین ، کپڑا بازار روڈ کا جائزہ لینے کے بعد  زائرین کے ذریعہ بھکاریوںکے سبب ہونے والے گندگی پر مکینوں کو نظر رکھنے اور اس کی شکایت کرنے کی اپیل کی ہےساتھ ہی وہاں آباد دکانداروں سے بھی درخواست کی ہے کہ وہ بھکاریوں کو کھانے کا پیکٹ دینے کے ساتھ ہی گندگی کرنے والے بھکاریوں کو نہ صرف ڈسٹ بین میں پیکٹ ڈالنے پر مجبور کریں بلکہ وہ خود بھی اپنے ہوٹلوں ، فٹ پاتھوں  اور سڑکوں کو صاف ستھرا رکھیں ۔اس سلسلہ میں جی نارتھ کے افسر اجیت کمار امبی نے کہا کہ ہوٹل مالکوں اور زائرین سے گندگی نہ کرنے کی اپیل کی گئی ہے لیکن اب اس پر عمل نہ کرنے اورخلاف ورزی کرنے والوں پر کارروائی کی جائے گی ۔