مغل بادشاہ اورنگ زیب کے تعلق سے بیان پر بھگوا خیمہ چراغ پا ، ابو عاصم اعظمی کو غدار قرار دے کر اسمبلی کی رکنیت منسوخ کرنےکا مطالبہ کیا

سماجوادی پارٹی کے ریاستی صدر اوررکن اسمبلی ابو عاصم اعظمی نے مغل بادشاہ اورنگ زیب کے تعلق سے گزشتہ روز میڈیا کو  ایک بیان دیا تھا جس میں انہوںنے اورنگ زیب کو بہتر حکمراں قرار دیا تھا اور اس کے نام پر فرقہ وارانہ سیاست بند کرنے کا مطالبہ کیا تھا لیکن  یہ مطالبہ اور اورنگ زیب کی تعریف فرقہ پرست پارٹیوں کے تلوئوں سے لگی اور سرپہ بجھی ۔ ان پارٹیوں کے اراکین نے منگل کو اسمبلی  اور کونسل دونوں جگہ ابو عاصم کے خلاف جم کر ہنگامہ کیا ، انہیں غدار قرار دے کر اسمبلی کی رکنیت ختم کرنے کا مطالبہ کیا اور ان کے خلاف فوراً ایف آئی آر درج کرنے کا مطالبہ بھی کردیا۔ اسی دوران شندے سینا کے ایک کارکن  نے تھانے میں ابو عاصم اعظمی کے خلاف کیس درج کرادیا ہے۔ یہ ایف آئی آر مرین ڈرائیو پولیس اسٹیشن منتقل کردی گئی ہے کیوں کہ انہوں نے اپنا بیان اسمبلی کے احاطے میں دیا تھا جو مرین ڈرائیو پولیس اسٹیشن کے تحت آتا ہے۔ 
 برسراقتدار اراکین  اسمبلی کی دھینگا مشتی 
    اس دوران اسمبلی اور کونسل میں نہایت جارحانہ انداز میں ہنگامہ آرائی کی گئی ۔ یہ ہنگامہ دیکھ کر محسوس  ہو رہا تھا کہ اسمبلی کے اراکین مہذب طریقے سے اپنا احتجاج  درج کرانا ہی نہیں چاہتے بلکہ صرف دھینگا مشتی ان کا مقصد ہے۔اس دوران چھتر پتی شیواجی  اورسمبھا جی مہاراج کی جے کے نعرے لگائے گئے اور اورنگ زیب کی تعریف کو پورے مہاراشٹر کی توہین قرار دیا گیا۔ اسی ہنگامے کے سبب متعدد مرتبہ اسمبلی کی کارروائی   ملتوی کی گئی اور ا س کے بعد بھی جب ہنگامہ نہیں تھما تو کارروائی دن بھر کے لئے ملتوی کردی گئی۔
غداری کا مقدمہ درج کرنے کا مطالبہ 
  مظاہرہ کرنے والے برسراقتدار پارٹیوں کے اراکین اور متعدد وزیر بھی یہ مطالبہ کر رہے تھے کہ ابو عاصم اعظمی کے خلاف ملک سے غداری کا مقدمہ درج کیا جائے اور انہیں اسمبلی سے فوراً معطل کیا جائے۔ حالانکہ اس دوران ابو عاصم اعظمی نے ویڈیو جاری کرکے وضاحت دی اور کہا کہ انہوں نے مراٹھی مورخین کے حوالے سے گفتگو کی تھی جس میں کسی کی توہین نہیں کی گئی ہے۔     
قانون ساز اسمبلی میں کیا ہوا؟
  اس سے قبل منگل کو اسمبلی کی کارروائی شروع ہوتے ہی بی جے پی کے  رکن اسمبلی یوگیش ساگر نے ابو عاصم اعظمی کے بیان کا معاملہ اٹھایا اورکہا کہ ’’اورنگ زیب جس نے چھترپتی سمبھاجی مہاراج کو جیل میں قید رکھا ، ان پر مظالم کئے ، ان کے زخموں پر نمک مل کر انہیں تکلیف دی ، اسے ابو عاصم اعظمی اچھاحکمراں قرار دے رہےہیں اور کہہ رہے ہیں کہ  اس نے کئی مندروں کیلئے فنڈ دیا تھا۔‘‘  یوگیش ساگر نےالزام لگایاکہ ابو عاصم غلط تاریخ بیان کر کے عوام کو گمراہ کر رہے ہیں۔ اس لئےان کے خلاف غداری کا مقدمہ درج کیاجائے اور انہیں اسمبلی سے نکال باہر کیا جائے ۔
دیگر لیڈروں نے حمایت کی 
  یوگیش ساگر کے بعد بی جےپی اور شیو سینا (شندے)  خیمے کے متعدد لیڈروں نے  ابو عاصم اعظمی کے خلا ف اسی طرح کی کارروائی کامطالبہ کیا اور ایوان میں ہنگامہ کرنے لگے۔ اس مطالبہ کی شیو سینا (ادھو) کے لیڈروں نے بھی حمایت کی۔ اس دوران ہنگامہ آرائی شروع ہو گئی اور بی جے پی کے لیڈروں کی جانب سے شیواجی مہاراج اورسمبھا جی مہاراج  کی جے کے نعرے بھی لگائے جانے لگے