والدہ شرمیلا ٹیگور نے بھی رکشا ڈرائیور سے ملاقات کی ،پولیس سیف کا بیان درج کرنے ان کے گھر پہنچی، تفتیشی افسرکو تبدیل کردیا گیا

 بالی ووڈ سپر اسٹار اور نواب آف پٹودی سیف علی خان نے بدھ کو اس رکشا والے کو اپنے گھر بلاکر اس سے ملاقات کی جو ۱۵؍ اور ۱۶؍ جنوری کی درمیانی شب انہیں اسپتال  لے گیا تھا ۔ اس رکشا ڈرائیور بھجن لال نے اسپتال لے جانے کا کوئی پیسہ بھی نہیں لیا تھا ۔ سیف نے بھجن لال کو اپنے گھر بلاکر اس کے ساتھ نہ صرف تصویر شیئر کی بلکہ اس کا شکریہ ادا کرتے ہوئے مالی مدد بھی کی ۔ اس دوران سیف کی والدہ شرمیلا ٹیگور بھی موجود تھیں ۔ انہوں نے بھی بھجن لال کا شکریہ ادا کیا اور کہا کہ وہ مصیبت کے وقت میں ان کے خاندان اور بیٹےکے لئے فرشتہ بن کر آئے۔واضح رہے کہ سیف علی خان گزشتہ روز ہی اسپتال سے ڈسچارج ہوکرگھر واپس آئے ہیں۔
 دریں اثناء اس معاملے میں مختلف گتھیوں کو سلجھانے میں مصروف ممبئی پولیس نے بدھ کو سیف کے گھر پہنچ کر ان کا بیان  درج کیا۔  اس بیان میں سیف نے تمام تفصیلات سے پولیس کو آگاہ کیا ہے لیکن اصل میں کیااب بیان دیا گیا ہے فی الحال پولیس نے یہ واضح نہیں کیا ہے۔ اسی دوران یہ اطلاع بھی ملی کہ ممبئی پولیس نے اس معاملے کے تفتیشی افسر سدرشن گائیکواڑ کو تفتیش سے ہٹاکر اس کی ذمہ داری اجئے لگنوکر کو سونپ دی ہے۔ ممبئی پولیس نے تفتیشی افسر کو عین درمیان تفتیش سے ہٹانے کی فی الحال کوئی وجہ نہیں بتائی ہے۔
 اس معاملے میں ایک اور اپ ڈیٹ یہ سامنے آئی کہ سیف نے اپنی سیکوریٹی کے لئے ایکٹر رونیت رائے کی سیکوریٹی ایجنسی کوٹھیکہ دے دیا ہے۔ اسی وجہ سے بدھ کو رونیت رائے بھی پولیس کے ساتھ سیف کی رہائش گاہ والی عمارت میں سیکوریٹی انتظامات کیلئے موجود تھے۔