۴۰؍ سال سے قائم تاریخی گلاسگو سینٹرل مسجد کو’ کیٹیگری اے لسٹڈ‘ بلڈنگ کا درجہ دے دیا گیا ہے۔

اسکاٹ لینڈ میں واقع ۴۰؍ سال سے قائم گلاسگو سینٹرل مسجد کو’ کیٹیگری اے لسٹڈ‘ بلڈنگ کا درجہ دے دیا گیا ہے۔ برطانوی نشریاتی ادارے بی بی سی کی رپورٹ کے مطابق ایچ ای ایس اسکاٹ لینڈ کے اس تاریخی فیصلے کے بعد یہ اسکاٹ لینڈ کی پہلی مسجد بن گئی ہے جسے یہ اعزاز حاصل ہوا ہے۔ مذکورہ مسجد۱۹۸۴ء میں تعمیر کی گئی تھی اور اسے اب اسکاٹ لینڈ کی تاریخی اور ثقافتی اہمیت کی حامل عمارتوں میں شامل کر لیا گیا ہے۔ اس اقدام کا مطلب ہے کہ اب اس عمارت کو خصوصی تحفظ حاصل ہوگا اور اس میں کسی قسم کی تبدیلی کرنے کے لئےسخت قواعد و ضوابط پر عمل کرنا ہوگا۔ 
واضح رہے کہ گلاسگو سینٹرل مسجد شہر کے درمیان میں واقع ہے اور یہ نہ صرف مذہبی سرگرمیوں کا مرکز ہے بلکہ ثقافتی ہم آہنگی اور بین المذاہب مکالمے کا بھی ایک اہم مقام ہے۔ 
رپورٹ کے مطابق ۴؍ ایکڑ پر محیط جگہ۱۹۸۴ء میں عوام کے لئے کھولی گئی جس پر۳؍ ملین یورو کی لاگت آئی تھی، یہ گلاسگو میں بنائی جانے والی پہلی خاص طور پر تعمیر شدہ مسجد تھی۔ اس کا فن تعمیر اسلامی اور جدید طرز کا حسین امتزاج پیش کرتا ہے جس کی وجہ سے یہ شہر کی پہچان بن چکی ہے۔ گلاسگو مسجد کے حالیہ فیصلے پر مسلمانوں اور مقامی باشندوں نے خوشی کا اظہار کیا ہے۔ ان کا کہنا ہے کہ یہ قدم نہ صرف مسجد کی تاریخی اہمیت کو تسلیم کرتا ہے بلکہ اسکاٹ لینڈ میں مسلمانوں کے مثبت کردار کو بھی اجاگر کرتا ہے۔ ان کا کہنا ہے کہ گلاسگو سینٹرل مسجد کو کیٹیگری اے لسٹڈ بلڈنگ کا درجہ ملنا اس بات کی عکاسی کرتا ہے کہ یہ عمارت نہ صرف مذہبی بلکہ ثقافتی اور تاریخی اعتبار سے بھی انتہائی اہمیت کی حامل ہے۔