مرکزی وزیر داخلہ نے جموں کشمیر میں سیکوریٹی کی صورتحال پر ایک اعلیٰ سطحی جائزہ میٹنگ کی صدارت کی۔ میٹنگ میں جموں کشمیر کے لیفٹیننٹ گورنر منوج سنہا بھی شریک تھے۔

مرکزی وزیر داخلہ امیت شاہ نے بدھ کو جموں کشمیر میں تمام سیکوریٹی ایجنسیوں کو ہدایت دی ہے کہ وہ دہشت گردی کے خلاف جنگ کو آگے بڑھائیں تاکہ دراندازی کو مکمل طور پر روکا جا سکے۔ شاہ نے بدھ کو یہاں جموں کشمیر میں سیکوریٹی کی صورتحال پر ایک اعلیٰ سطحی جائزہ میٹنگ کی صدارت کی۔ منگل کو بھی انہوں نے جموں کشمیر کی سیکوریٹی صورتحال پر ایک اہم جائزہ میٹنگ کی تھی جس میں آرمی چیف جنرل اوپیندر دویدی، مرکزی داخلہ سیکریٹری اور کئی سینئر افسران نے شرکت کی تھی۔ 
 میٹنگ سے خطاب کرتے ہوئے مرکزی وزیر داخلہ نے کہا کہ وزیر اعظم نریندر مودی کی قیادت میں مرکزی حکومت جموں کشمیر سے دہشت گردی کو مکمل طور پر ختم کرنے کیلئے پرعزم ہے۔ انہوں نے کہا کہ مودی حکومت کی مسلسل اور مربوط کوششوں کی وجہ سے جموں کشمیر میں دہشت گردی کا نظام نمایاں طور پر کمزور ہوا ہے۔ وزیر داخلہ نے تمام سیکوریٹی ایجنسیوں کو ہدایت دی کہ وہ دہشت گردی کے خلاف جنگ کو آگے بڑھائیں۔ انہوں نے کہا کہ تمام سیکورٹی ادارے دراندازی اور دہشت گردی کے خلاف انتہائی سخت کارروائی کریں۔ ہمارا مقصد دہشت گردوں کے وجود کو مکمل طور پر ختم کرنا ہے۔ 
  شاہ نے کہا کہ نارکو نیٹ ورک دہشت گردوں کو اپنی سرگرمیاں انجام دینے میں مدد فراہم کر رہے ہیں۔ انہوں نے کہا کہ منشیات سے حاصل ہونے والی رقم سے دہشت گردی کی فنڈنگ ​​کیخلاف فوری کارروائی کرنے کی ضرورت ہے۔ شاہ نے ایجنسیوں کو ہدایت دی کہ وہ نئے فوجداری قوانین کے پیش نظر فارنسک سائنس لیبارٹری کے عہدوں پر نئی تقرری کریں۔ 
 انہوں نے دہشت گردی سے پاک جموں کشمیر کے مقصد کو حاصل کرنے کیلئے مودی حکومت کی دہشت گردی کے خلاف زیرو ٹالرنس کی پالیسی پر زور دیا۔ انہوں نے تمام سیکوریٹی ایجنسیوں کو الرٹ رہنے اور جموں کشمیر میں دہشت گردی کو ختم کرنے کے لئے تال میل سے کام جاری رکھنے کی ہدایت دی۔ 
 وزیر داخلہ نے جموں کشمیر میں سیکوریٹی کے تمام معیارات میں نمایاں بہتری لانے کے لئے سیکورٹی ایجنسیوں کی کوششوں کی تعریف کی۔ 
 میٹنگ میں جموں کشمیر کے لیفٹیننٹ گورنر منوج سنہا، مرکزی داخلہ سیکریٹری، ڈائریکٹر انٹیلی جنس بیورو، جموں کشمیر کے چیف سیکریٹری اورپولیس کے ڈائریکٹر نیز وزارت داخلہ اور جموں کشمیر انتظامیہ کے اعلیٰ حکام نے شرکت کی۔