شاہ رخ خان کو جان سے مارنے کی دھمکی دینےسے قبل فیضان خان نے شاہ رخ خان اور ان کے بیٹے آرین خان کی حفاظت کے تعلق سے حساس معلومات اور ان کی نقل و حرکت کے تعلق سے بھی آن لائن تحقیق کی تھی۔

تحقیقات میں یہ بات سامنے آئی ہے کہ بالی ووڈ سپر اسٹار شاہ رخ خان کو قتل کی دھمکی دے کر ۵۰؍ لاکھ کی رقم کا مطالبہ کرنے والا وکیل فیضان خان جسے رائے پور سے گرفتار کیا گیا تھا، دھمکی دینے سے قبل اداکار سے متعلق کئی حسا س معلومات آن لائن حاصل کرنے کی کوشش تھی،باندرہ پولیس کی تحقیقاتی ٹیم نے فیضان کے دوسرے موبائل فون کے فورنسک تجزیہ کے بعد اس بات کا خلاصہ کیا ہے، فی الوقت ملزم ۱۰؍ دنوں کی عدالتی تحویل میں ہے۔تاہم ملزم تفتیش میں ان محرکات کی بابت مضحکہ خیز اور گمراہ کن جواب دے رہا ہے، جبکہ اداکار کو وائے پلس تحفظ حاصل ہے۔

یہ بھی پڑھئے: شاہ رخ خان اور پریتی زنٹا کی فلم ’’کل ہو نا ہو‘‘ ۱۵؍نومبر کو ری ریلیز ہوگی

واضح رہے کہ باندرہ پولیس اس وقت حرکت میں آگئی جب ایک نامعلوم شخص نے باندرہ پولیس چوکی کے لینڈ لائن نمبر پر فون کرکے پولیس اہلکار سے کہا کہ’’ وہ جو شاہ رخ خان نہیں ہے،جو بینڈاسٹینڈ والے بنگلے میں رہتا ہے،اگر اس نے۵۰؍ لاکھ نہیں دئے تو میں اسے قتل کر دوں گا۔‘‘جب اہلکار نے اس کی شناخت دریافت کی تو اس نے کہا کہ’’ اس سے کوئی فرق نہیں پڑتا،میرا نام ہندوستانی ہے۔‘‘ اور فون کال منقطع کر دیا۔پولیس نے فوراً معاملہ درج کیا۔تکنیکی شعبے کے مدد سے چھتیس گڑھ کے رائے پور کا نمبر ٹریس کیا، اور مقامی پولیس کی مدد سے فیضان تک رسائی حاصل کرنے میں کامیاب ہو گئی۔اور ۱۲؍ نومبر کو حراست میں لے کر ممبئی لایا گیا۔
ملزم کو عدالت میں پیش کیا گیا ،جہاں اسے ۱۸؍ نومبر تک پولیس کی تحویل میں دے دیا اور پھراسے ۱۴؍ دن کی عدالتی تحویل میں دے دیا گیا۔