تمل ناڈو اور اطراف میں  پچھلے تین دنوں  سے شدید بارش کے سبب معمولات زندگی درہم برہم رہے۔ کئی علاقے زیر آب آگئے تھے۔ تاہم بدھ کو موسلادھار بارش کا سلسلہ تھم گیا ہے۔

تمل ناڈو اور اطراف میں  پچھلے تین دنوں  سے شدید بارش کے سبب معمولات زندگی درہم برہم رہے۔ کئی علاقے زیر آب آگئے تھے۔ تاہم بدھ کو موسلادھار بارش کا سلسلہ تھم گیا ہے۔ رپورٹ کے مطابق خلیج بنگال پر کم دباؤ کا علاقہ گزشتہ ۶؍ گھنٹے کے دوران۱۵؍ کلومیٹر فی گھنٹہ کی رفتار سے مغرب-شمال مغرب کی طرف بڑھ گیا ہے اور جمعرات کی صبح چنئی کے قریب پڈوچیری اور نیلور کے درمیان شمالی تمل ناڈو-جنوبی آندھرا پردیش کے ساحلوں کو عبور کرجائے گا۔ 
 محکمہ موسمیات نے کہا کہ منگل کی رات سے چنئی اور اس کے آس پاس کے اضلاع میں ریڈ الرٹ جاری کیا گیا تھا، لیکن بارش میں کمی آئی ہے۔ بارش منگل کی رات۹؍ بجے سے کم ہوگئی، تاہم، شہر اور اس کے نواحی علاقوں اور آس پاس کے اضلاع میں گزشتہ رات دیر گئے اوربدھ کی صبح ہلکی سے درمیانی بارش ہوئی۔ دن کے وقت بیشتر علاقوں میں بارش مکمل طور پر رک گئی تاہم دوپہر کے قریب ہلکی بارش ہوئی۔ 
محکمہ موسمیات نے بدھ کو ایک بلیٹن میں کہا کہ جنوب مغربی خلیج بنگال میں دباؤ گزشتہ چھ گھنٹوں کے دوران۱۵؍ کلومیٹر فی گھنٹہ کی رفتار سے مغرب-شمال مغرب کی طرف بڑھ گیا ہے۔ نجی موسمی بلاگرز کے مطابق، ڈپریشن کمزور رہا اور تمل ناڈو سے تھوڑی دور جنوبی آندھرا کے ساحل کی طرف بڑھ سکتا ہے، جس سے انتہائی شدید بارشوں سے راحت ملنے کی امید ہے۔ 
رپورٹ کے مطابق محکمہ موسمیات نے کہا کہ ریڈ الرٹ جاری ہے کیونکہ اگلے دو دنوں تک چنئی اور ریاست کے کئی اضلاع سمیت تمل ناڈو کے شمالی ساحلی علاقوں میں درمیانے سے بھاری درجے کی بارش اور کبھی کبھی بھاری سے بہت بھاری بارش کا امکان ہے۔