لاکھوں کی تعداد میں لوگ رات بھر ذکر، قرآن خوانی، درودو سلام، نمازوں کی ادائیگی اور مجالس میں مصروف رہے۔ حیدرآباد میں چنچل گوڑہ جونیئر کالج گراؤنڈ، خلوت پلے گراؤنڈ، چوک کی مسجد اورمکہ مسجد میں سب سے بڑے اجتماعات ہوئے۔

  حیدرآباد(ایجنسی)تلنگانہ اور آندھراپردیش کی مساجد، زیارت گاہوں اور خانقاہوں میں شب معراج کے سلسلے میں عظیم الشان اور رُوح پرور اجتماعات ہوئے۔ لاکھوں کی تعداد میں لوگ رات بھر  ذکر واذکار، قرآن خوانی، درودو سلام، نمازوں کی ادائیگی اور مجالس میں مصروف رہے۔ اس دوران علمائے کرام نے خطاب کیا۔شہر حیدرآباد میں چنچل گوڑہ جونیئر کالج گراؤنڈ، خلوت پلے گراؤنڈ،چوک کی مسجد اورمکہ مسجد میں سب سے بڑے اجتماعات منعقد ہوئے جس میں لاکھوں کی تعداد میں لوگوں نے شرکت کی۔ اس موقع پر شب معراج سے ایک دن پہلے قبرستانوں کی بھی صفائی کا کام تلنگانہ وقف بورڈ کی جانب سے بڑے پیمانے پر کیا گیا تھا۔شب معراج کے موقع پر قبرستانوں میں قبور کی زیارت کرنے آنے والوں کے لئے روشنی کا انتظام کیا گیا تھا۔شب معراج اور منگل کی صبح بھی لوگ کثیر تعداد میں قبرستانوں میں اپنے مرحومین کے لئے ایصال ثواب اور ان کی قبور کی زیارت کرتے ہوئے دیکھے گئے۔ انتظامیہ نے اس کیلئے خصوصی انتظامات کئے تھے۔
 لوگوں نے ان روح پرور اجتماعات میں فلسفہ معراج، عظمت معراج، مقاصد معراج اور پیغام معراج کی عالمانہ طرز و انداز میں کی گئی تشریح  سے بھر پور استفادہ کیا۔ عمائدین ملت اور زعمائے ملت نے کہا کہ معراج النبی ؐ کا عظیم الشان عملی واقعہ اور بے نظیر معجزہ دراصل انسانی فکر اور شعور کے انقلاب کا نام ہے۔ حضرت محسن انسانیت ؐ کی معراج کے واقعہ  ہی سے  انسانی دنیا میں تحقیق، تفتیش، تلاش اور جستجو کی تڑپ پیدا ہوئی اور دور حاضر کا انسان چاند اور ستاروں پر کمندیں ڈالنے کا اہل بن سکا۔انہوں نے کہا کہ معراج کے اہم واقعہ میں بے پناہ عبرت اور نصیحت کے ساتھ ساتھ دعوت و موعظت کے بھی بے شمار پہلو پنہاں ہیں جو ہر دور اور ہر زمانے میں اہل حق اور اہل فکر کیلئے مشعل راہ ہیں۔ 
 اس دوران آندھرا پردیش کے مختلف مقامات پر بھی شب معراج کی مناسبت سے بڑے بڑے اجتماع منعقد ہوئے۔ ہزاروں افراد نے شب معراج کے روح پرور اجتماعات میں شرکت کی۔