سینئرمیونسپل افسر نے بتایا کہ اس بریج کی ۳؍لین کا کام تکمیل کے قریب ہیں۔

لوور پریل میں واقع ڈیلائل روڈ بریج کو مرمت کے لئے ۲۰۱۸ء میں بند کیا گیا تھا اور جون کی ابتداء میں اسے جزوی طور پر شروع کیا گیا تھا۔ اب نومبر میں اسے گاڑیوں کی آمد و رفت کیلئے مکمل طور پر شروع کرنے کا امکان ہے۔ واضح رہے کہ ڈیلائل روڈ بریج وسطی ممبئی کے لوور پریل علاقے کے مشرقی اور مغربی حصہ کو جوڑتا ہے جس کی وجہ سے یہ کافی اہمیت کا حامل ہے۔ اس بریج کو کمزور ہوجانے کی وجہ سے ۲۴؍ جولائی ۲۰۱۸ء کو منہدم کرنا شروع کیا گیا تھا۔ اس پل کا ایک حصہ گاڑیوں کی آمدورفت کیلئے جون میں کھول دیا گیا تھا اور اس وقت یہ اعلان کیا گیا تھا کہ باقی بقیہ حصہ ایک ماہ بعد جولائی میں شروع کردیا جائے گا لیکن برسات کا پورا موسم گزر جانے کے بعد اب بی ایم سی افسران نے اس بریج کو مکمل طور پر کھولنے کا اشارہ دیا ہے۔
 ایک سینئر بی ایم سی افسر کے مطابق ڈیلائل روڈ کی بقیہ ۳؍ لین مکمل ہونے کے قریب ہیں اور نومبر میں اس بریج کو مکمل طور پر شروع کر نے کی قوی امید ہے۔
 یہ نیا بریج مکمل طور پر اسٹیل سے بنا ہوا ہے اور راستے میں چند رکاوٹوں کی وجہ سے اسے ۶۵؍ ڈگری ترچھا تعمیر کیا گیا ہے۔ اس بریج کی کُل لمبائی ۹۰؍ میٹر ہےاور مکمل طور پر تعمیر ہوجانے پر اس پر گاڑیوں کی آمدورفت کیلئے ۳؍ لین ہوں گی۔ اس کے علاوہ ریلوے اسٹیشن سے آنے والے راہگیروں کو سہولت سے بریج پرچڑھنے کیلئے خودکارزینہ بھی لگایا جائے گا۔
 یہ بریج ریلوے ٹریک کے اوپر سے گزرتا ہے اور پٹریوں کے اوپرسے گزرنے والے حصہ کو منہدم کرنے کی کارروائی ۲۰۱۹ء میں شروع ہوئی تھی۔ اس پل کی تعمیر کیلئے پہلا گرڈر جون ۲۰۲۲ء میں بچھایا گیا تھا۔بریج کی ایک سڑک امسال یکم جون کو شروع کی گئی تھی۔