بی جےپی قانون ساز پارٹی کی میٹنگ اب ۱۰؍ کی بجائے ۱۱؍ جون کو ہوگی ،بھونیشور کے جنتا میدان پر تیاریاں جاری۔

ادیشہ میں نو منتخبہ بی جے پی حکومت کی حلف برداری کی تقریب۱۲؍ جون کو منعقد ہوگی۔پارٹی کے ترجمان جتن موہانٹی نے اتوار کو یہ اطلاع دی۔ اس سے قبل مودی نے ادیشہ میں اپنی انتخابی ریلیوں کے دوران اعلان کیا تھا کہ تقریب۱۰؍ جون کو ہوگی۔ مودی نے کئی ریلیوں میں کہا تھا کہ بیجو جنتا دل (بی جے ڈی) حکومت کی میعاد۴؍ جون کو ختم ہو جائے گی اور بی جے پی کے نئے وزیر اعلیٰ، ادیشہ کا بیٹا یا بیٹی۱۰؍ جون کو بھونیشور میں حلف لیں گے۔
موہانٹی نے کہا کہ چونکہ مودی اتوار کی شام کو وزیر اعظم کے طور پر حلف لیں گے اور۱۰؍ جون کو ان کے کئی دیگر اہم پروگرام ہیں اس لیے ادیشہ میں بی جے پی حکومت کی مجوزہ حلف برداری کی تقریب ۱۲؍جون کو مقرر کی گئی ہے۔ انہوں نے بتایا کہ۱۰؍جون کو ہونے والی بی جے پی قانون ساز  پارٹی کی میٹنگ اب۱۱؍ جون کو ہوگی۔ بی جے پی کے ترجمان نے کہا کہ پارٹی لیڈر کا انتخاب بی جے پی لیجسلیچر پارٹی میٹنگ میں کیا جائے گا، جسے بی جے پی پارلیمانی بورڈ منظوری دے گا۔ذرائع نے بتایا کہ بی جے پی کے کسی سینئر ایم ایل اے کو وزیر اعلیٰ کے طور پر منتخب کیا جاسکتا ہے اور پارٹی کے ایک اور سینئر لیڈر کو حکومت میں شامل کرنے کے لئے نائب وزیر اعلیٰ کا عہدہ بھی بنائے جانے کا امکان ہے۔اس دوران شہر کے مشہور جنتا میدان میں تقریب کی تیاریاں زور و شور سے جاری ہیں۔