انتظامات کیلئے ماہم پولیس اسٹیشن اور درگاہ کمیٹی کے دفتر میں ۲؍ میٹنگیں ہوچکی ہیں۔ درگاہ انتظامیہ کے مطابق میلہ ۲۷؍دسمبر سے شروع ہوگا۔

ماہم کا میلہ امسال نہیں لگے گا ، پولیس نے اجازت دینے سے انکار کردیا ہے۔ اس طرح کی گشت کرنے والی خبروں کی درگاہ انتظامیہ نے تردید کی اور کہا کہ یہ ماہم میلے کا ۱۲۱؍واں سال ہے۔ ‌امسال ۲۷؍ دسمبر سے شروع ہونے والے ۱۰؍ روزہ میلےکے لئے اب تک پولیس اسٹیشن اور ماہم درگاہ کمیٹی کے دفتر میں ۲؍ میٹنگیں ہوچکی ہیں ۔ اس میں پولیس کے اعلیٰ افسران کے علاوہ مختلف ایجنسیوں کے افسران کے ساتھ صندل لانے والی کمیٹیاں اور دکاندار بھی شریک ہوئے۔ اس لئے سنیچر کی شب تک ایسی کوئی اطلاع پولیس کی جانب سے درگاہ انتظامیہ کو موصول نہیں ہوئی ہے۔ 
نمائندۂ انقلاب کے استفسار پر سہیل کھنڈوانی نے مذکورہ بالا تفصیلات بتائیں ۔انہوں نے یہ بھی بتایا کہ انتظامات حسب معمول شروع کردیئے گئے ہیں ، یہ میلہ اپنی نوعیت کا تاریخی میلہ ہے جس کا ۱۹۰۱ء کا گزٹ ہے۔ اس لئے اسی اہتمام کے ساتھ امسال لگایا جائے گا اور ملک کے مختلف حصوں سے دکاندار انواع واقسام کی اشیاء لے کر میلے میں شریک ہوں گے۔سہیل کھنڈوانی کے مطابق اس موقع پر یہ وضاحت ضروری ہے کہ یہ عرس نہیں میلہ ہے، ہاں یہ ضرور ہے کہ اس کے انعقاد میں ماہم درگاہ انتظامیہ کا کلیدی رول ہوتا ہے اور اس کی جانب سے بڑی تعداد میں ‌رضاکار بھی نگرانی کے لئے مامور کئے جاتے ہیں اورپہلا صندل ممبئی پولیس کی جانب سے پیش کیا جاتا ہے۔