پرینکا گاندھی کی بی جے پی پر تنقید، کہا’’ جنہوں نے آئین پر حملے کئے ان کا یہ دن منانا حیران کن نہیں ہے۔‘‘

۲۵؍ جون ۱۹۷۵ء کو اندرا گاندھی حکومت نے ملک میں ایمرجنسی کا نفاذ کیا تھا۔ بی جے پی حکومت اس دن کو ہر سال ’یوم قتل آئین‘ کے طور پر منانا چاہتی ہے۔ اس تعلق سے اندرا گاندھی کی پوتی اور کانگریس کی جنرل سیکریٹری  پرینکا گاندھی نے حیرات کا اظہار کیا ہے۔  پرینکا  نے کہا’’ جو لوگ بار بار آئین پر حملہ کرتے رہتے ہیں، وہ منفی جذبے  کے تحت یوم قتل آئین منا رہے ہیں۔‘‘
 پرینکا گاندھی نے ٹویٹ کے ذریعے حکومت پر تنقید کرتے ہوئے کہا ’’ جنہوں نے کبھی آئین کو تسلیم نہیں کیا، آئین کے نفاذ کی مخالفت کی، کبھی اس کا احترام نہیں کیا اور دستور ہند کو ختم کرنے کا مطالبہ کرتے رہے،  وہی لوگ اب یوم قتل `آئین  منانے جا رہے ہیں۔‘‘ پرینکا گاندھی نے کہا، `ہندوستان کے عظیم لوگوں نے تاریخی جنگ لڑ کر اپنی آزادی اور اپنے آئین کو حاصل کیا ہے۔ جن لوگوں نے آئین کو بنایا، یا جو آئین پر یقین رکھتے ہیںوہی لوگ آئین کی حفاظت کریں گے۔‘‘ انہوں نے کہا کہ’’ جن لوگوں نے آئین کے نفاذ کی مخالفت کی، آئین پر نظرثانی کیلئے کمیشن تشکیل دیا، آئین کو ختم کرنے کا مطالبہ کیا، اپنے فیصلوں اور اقدامات سے آئین اور جمہوریت کی روح پر بار بار حملہ کیا، وہ تو ’منفی سیاست‘ پر مبنی فیصلے کے تحت یوم قتل آئین منائیں گے ہی۔ ‘‘ خاتون لیڈر نے کہا ’’یہ کوئی حیران کن بات نہيں ہے۔‘‘ 
یاد رہے کہ بی جے پی کانگریس کو زچ کرنے کیلئے بار بار ایمرجنسی کا تذکرہ کرتی ہے جبکہ خود اپنی ’آستھا‘ کو آئین سے اوپر بتاتی ہے۔