امراوتی سے مزدوری کرنے آئے ۱۲؍ افراد سڑک کنارے سو رہے تھے، پہلی ہی رات ان کے ساتھ حادثہ پیش آیا، مہلوکین میں ۲؍ معصوم بچے۔

اتوار کی دیر رات پونے کے واگھولی علاقے میں ایک اندوہناک حادثہ پیش آیا۔ ایک تیز رفتار ڈمپرنے فٹ پاتھ پر سوئے ہوئے ۹؍ لوگوں کو کچل دیا۔  ان میں سے ۳؍ لوگوں کی موقع ہی پر موت واقع ہو گئی۔ مہلوکین مزدور پیشہ افراد تھے۔ اس واقعے کی وجہ سے علاقے میں افرا تفری پھیل گئی۔ ڈمپر کا ڈرائیور موقع سے فرار ہو گیا تھا لیکن بعد میں پولیس نے اسے گرفتار کر لیا۔ 
اطلاع کے مطابق پونے کے واگھولی علاقے میں واقع کیسانند پھاٹہ کے قریب ایک فٹ پاتھ پر تقریباً ۱۲؍ افراد سوئے ہوئے تھے ۔ یہ سبھی امراوتی سے یہاں مزدوری کرنے آئے تھے ۔ رات تقریباً ساڑھے ۱۲؍ بجے ایک تیزرفتار ڈمپر فٹ پاتھ پر چڑھ گیا جس نے سوئے ہوئے مزدوروں میں سے ۹؍ کو کچل دیا۔
ان میں سے ۲؍ معصوم بچوں سمیت ۳؍ کی موقع ہی پر موت ہو گئی۔ مہلوکین کے نام  وشال ونود پوار (۲۲) ویبھوی رتیش پوار (  ۱) اور  ویبھو رتیش پوار ( ۲) ہیں۔ جبکہ دیگر ۶؍ بری طرح زخمی ہیں جن کے نام رنیشا  ونود پوار( ۱۸)  جانکی دنیش پوار (۲۱) روشن ششادو بھونسلے (۹) ناگیش نیورتی پوار(۲۷) درشن سنجے ویرل ( ۱۸)  اور الیشا  ونود پوار (۴۷) ہے۔ زخمیو کو ساسون اسپتال میں داخل کیا گیا ہے۔ ان میں سے ۳؍ کی حالت نازک بتائی جا رہی ہے۔  
حادثے کے بعد ڈرائیور گاڑی چھوڑ کر فرار ہو گیا تھا۔ پولیس نے ڈمپر کو ضبط کر لیا۔ پیر کی صبح ڈرائیور کو بھی گرفتار کر لیا گیا۔ پولیس گجانن ٹوٹے نامی اس ڈرائیور سے پوچھ تاچھ کر رہی ہے۔ کہا جا رہا ہے کہ حادثے کے وقت ڈرائیور نے شراب پی رکھی تھی۔ اس کی تحقیقات جاری ہے۔