ممبئی دبئی انڈر واٹر ٹرین پروجیکٹ کے تحت دونوں ممالک کے درمیان صرف ۲؍ گھنٹے میں سفر ممکن ہوسکے گا۔ تاہم، اس منصوبے پر دونوں ممالک کے درمیان بات چیت جاری ہے۔

کیا ممبئی سے دبئی تک کا سفر صرف دو گھنٹے میں ممکن ہے؟ وہ بھی ٹرین سے؟ جی ہاں، متحدہ عرب امارات (یو اے ای) کی جانب سے پانی کے اندر ٹرین خدمات کے آغاز سے جلد ہی ایسا ممکن ہو سکتا ہے۔ یو اے ای کے نیشنل ایڈوائزر بیورو لمیٹڈ کا یہ منصوبہ نہ صرف دونوں ممالک کے درمیان سفر کو تیز تر بنائے گا بلکہ اسے مزید سہل اور آسان بھی بنائے گا۔ انڈیا یو اے ای زیر آب ٹرین ایک بار شروع ہونے کے بعد، سفر کے وقت میں ایک گھنٹہ سے زیادہ کی کمی ہوگی۔ عام طور پر، پرواز کے ذریعے ممبئی سے دبئی جانے میں ۳؍ سے ساڑھے تین گھنٹے لگتے ہیں۔ ٹرین میں جدید ترین ٹیکنالوجی کا استعمال کیا جائے گا، جیسے ہائپر لوپ سسٹم، جس سے مسافر تیزی سے اپنی منزل تک پہنچ سکیں گے۔ اس قدم سے سفری لاگت میں بھی کمی آئے گی، لوگوں کی جیبوں پر معاشی بوجھ بھی کم ہوگا۔ تاہم، اس ٹرین سے سفر کا کرایہ کتنا ادا کرنا ہوگا، اس کے بارے میں نہیں بتایا گیا ہے۔ 
خیال رہے کہ ہندوستان اور یو اے ای کے درمیان تقریباً ۲؍ ہزار کلومیٹر کا فاصلہ ہے۔ زیر آب ٹرین مسافروں کو ایک متبادل فراہم کرے گی۔ فی الحال یو اے ای تک کا سفر صرف پرواز کے ذریعے ہی ممکن ہے۔ اس منصوبے سے سیاحت کو فروغ ملے گا۔ ممبئی دبئی انڈر واٹر ٹرین کو نہ صرف عام مسافروں کیلئے استعمال کیا جائے گا بلکہ ٹائمز آف انڈیا کی ایک رپورٹ کے مطابق، اس ٹرین کے ذریعے ہندوستان اور یو اے ای کے درمیان تجارتی تعلقات کو بڑھانے کیلئے خام تیل اور پانی سمیت سامان کی نقل و حمل کا بھی منصوبہ ہے۔ مجوزہ زیر آب ریل لنک سے متعلق تاریخوں کو حتمی شکل دینا ابھی باقی ہے، لیکن دونوں ممالک اس پروجیکٹ پر بات چیت کر رہے ہیں۔