شہر میں سیمنٹ کنکریٹ کی سڑکیں بنانے کیلئے تقریباً سبھی پرانی سڑکوں کو کھود دیا گیا ہے۔ ڈرینیج کی لائن بچھانے کیلئے بھی جگہ جگہ کھدائی کی گئی ہے۔

 شہر میں سیمنٹ کنکریٹ کی سڑکیں بنانے کیلئے تقریباً سبھی پرانی سڑکوں کو کھود دیا گیا ہے۔ ڈرینیج کی لائن بچھانے کیلئے بھی جگہ جگہ کھدائی کی گئی ہے۔ سڑکوں کی دگرگوں حالت کا خمیازہ عام لوگوں کو بھگتنا پڑ رہا ہے۔ ۱۰؍ روز قبل ماہر نسواں ڈاکٹر کی گڑھے میں گر کر موت واقع ہوگئی تھی اس کے ۲؍ زور بعد شہری انتظامیہ کی جانب سے کھودے گڑھ میں گر کر ایک نوجوان درد ناک موت ہوگئی تھی۔ ایک بار پھر کنکریٹ اور ڈرینیج لائن کیلئے کھودے گئے گڑھے میں ایک بائیک سوار اور پیچھے بیٹھا نوجوان گر کر بری طرح سے زخمی ہوگئے ہیں۔ 
 پچھلے چند مہینوں سے الہاس نگر کی خستہ حال سڑکوں کے سبب شہریوں کو کافی پریشانی اٹھانی پڑرہی ہے۔ جگہ جگہ کھدائی کے نتیجے میں سڑک کا ایک حصہ نیچے چلا گیا ہے جس سے گاڑی چلانے والوں کا توازن بگڑ رہا ہے۔ کھدائی کے سبب ٹریفک جام کا مسئلہ معمول بنتا جارہا ہے۔ لہٰذا کلیان، بدلاپور اور امبرناتھ کی سمت جانے والوں کو گھنٹوں ٹریفک جام میں پھنسے رہنا پڑ رہا ہے۔ سنیچر کو کیمپ نمبر ۴ ؍میں ایک راہگیر کنکریٹ کیلئے کھودے گڑھے میں گر کر زخمی ہوگیا تھا۔ گزشتہ روز کیمپ نمبر ۳؍ میں زیر زمین سیوریج لائن کیلئے کھودے گئے گڑھے میں ایک بائیک سوار اور اس کا دوست گر گیا۔ راہگیروں نے فوری طور پر دونوں نوجوانوں کو باہر نکالا۔ عیاں رہے کہ متعلقہ ٹھیکیدار نے اس جگہ پر حفاظتی بیریکیڈ یا سائن بورڈ نہیں لگایا تھا۔