رکن پارلیمان ورشا گائیکواڑ نے احتجاجی مورچہ میں شرکت کرتے ہوئے مندر دوبارہ تعمیر کروانے کے جین سماج کے مطالبہ کی حمایت کا اعلان کیا

ولے پارلے ایسٹ میں دگمبرجین مندر کو بی ایم سی کے ذریعے آناً فاناً منہدم کرنے کے خلاف سنیچر کو جین سماج کی جانب سے مورچہ نکالا گیا ۔ اس مورچے میں بڑی تعداد میں خواتین اور مذہبی رہنماؤںکے ساتھ ساتھ ممبئی کانگریس کی صدر و رکن پارلیمان ورشا گائیکواڑ نے بھی شرکت کی اور مندر دوبارہ تعمیر کروانےکی جین سماج کے مطالبےکی حمایت کرنے کااعلان کیا ۔ ورشا گائیکواڑ نے الزام لگایاکہ مذکورہ مندر کے معاملہ عدالت میں سماعت ہونے والی تھی لیکن بی ایم سی کے اہلکاروں نے عدالت کے فیصلے کا انتظار کئےبغیر مندر کو منہدم کر دیا۔ جین مندر کے انہدام کے دوران، جین تیرتھنکروں کی مورتیوں، ان کے منتر، قابل احترام کتابوں اور صحیفوں کو ہٹانے بھی نہیں دیا گیا اور ان کی بھی توہین کی گئی۔
 ورشا گائیکواڑ نے جین مندر کے انہدام کو پہلے سے منصوبہ بند سازش قرار دیتے ہوئے کہا کہ اس کے لئےبی جے پی اتحاد کی `بلڈوزر حکومت    ذمہ دار ہے۔
 اس بارے میں جانکاری دیتے ہوئے رکن پارلیمنٹ ورشا گائیکواڑ نے کہا کہ جب انہوں نے جین مندر کے انہدام کے سلسلے میں میونسپل کمشنر بھوشن گگرانی سے بات کی تو انہوں نے یقین دلایا کہ اسی جگہ پر دوبارہ دگمبر جین مندر بنایا جائے گا۔ رکن پارلیمنٹ نے یہ بھی کہا کہ مندر کمیٹی کے مطابق ایک ہوٹل کا مالک اس جگہ پر بار کھولنا چاہتا ہے اور اس مقصد کے لئےیہ انہدامی کارروائی کی گئی۔انہوںنے کہا کہ ’’جب معاملہ عدالت میں تھا اور سماعت چند گھنٹوں میں شروع ہونے والی تھی تو بی ایم سی کے افسران نے اتنی جلد بازی کیوں دکھائی؟ 
افسر کا تبادلہ
 مندر کے انہدام کی وجہ سے جاری ہنگامہ کے پیش نظر ’کے ایسٹ‘ کے وارڈ آفیسر نوناتھ گھاڈگے کا تبادلہ کردیا گیا ہے۔ اطلاع کے مطابق ’ایچ ایسٹ‘ کے وارڈ آفسر سواپناجا شرساگر کو کے ایسٹ وارڈ کا اضافی چارج دے دیا گیا ہے۔