این ڈی اے کی ایک اہم شریک پارٹی جنتا دل یو نے مرکزی حکومت کو وقف ترمیمی بل سے متعلق ۳؍مشورے پیش کئے ہیں۔ جنتا دل یو سے جڑے لیڈران کا کہنا ہے کہ حکومت سے ان کو یقین دلایا گیا ہے کہ جب وقف ترمیمی بل بحث کے دوران آئے گا تو پارٹی کے ذریعہ دیئے گئے مشوروں کو شامل کیا جائے گا۔

مرکزی حکومت وقف ترمیمی بل کو جلد ہی ایوان میں پیش کرنے والی ہے۔ اس سے قبل مسلم طبقہ بل کے خلاف پرامن انداز میں مظاہرہ کر رہی ہے۔ مساجد میں نمازی بطور احتجاج بازو پر سیاہ پٹی باندھ کر پہنچ رہے ہیں اور کئی مقامات پر احتجاجی مظاہرے بھی کئے گئے ہیں۔ اس درمیان این ڈی اے کی ایک اہم شریک پارٹی جنتا دل یو نے مرکزی حکومت کو وقف ترمیمی بل سے متعلق ۳؍مشورے پیش کئے ہیں۔ 
جنتا دل یو سے جڑے لیڈران کا کہنا ہے کہ حکومت سے ان کو یقین دلایا گیا ہے کہ جب وقف ترمیمی بل بحث کے دوران آئے گا تو پارٹی کے ذریعہ دیئے گئے مشوروں کو شامل کیا جائے گا۔ پارٹی کے ذریعہ دیئے گئے۳؍ مشوروں سے متعلق جانکاری بھی سامنے آئی ہے۔ بتایا جا رہا ہے کہ جنتا دل یو نے مرکزی حکومت سے کہا ہے کہ زمین چونکہ ریاست کا معاملہ ہے، لہٰذا نئے قانون میں بھی یہی ترجیح برقرار رہے۔ دوسرا مشورہ یہ ہے کہ نیا قانون ان وقف جائیدادوں پر نافذ نہیں ہوگا جو کہ پہلے سے ہی رجسٹرڈ ہیں، لیکن غیر رجسٹرڈ متنازعہ یا سرکاری ملکیت سے متعلق فیصلہ وقف ترمیمی بل میں طے پیمانوں کے حساب سے ہوگا۔ علاوہ ازیں اگر کوئی وقف ملکیت سرکاری زمین پر ہے، تو اس کا فیصلہ بھی نئے بل کے مطابق ہوگا۔ 

یہ بھی پڑھئے: گرمی کی لہرکے سبب اسکولوں کو صبح کے اوقات میں کلاسیز منعقد کرنے کی ہدایت

وقف ترمیمی بل سے متعلق نتیش کمار کی پارٹی کے ذریعہ دیا گیا تیسرا مشورہ بھی اہم ہے۔ مرکزی حکومت سے کہا گیا ہے کہ اگر کوئی وقف ملکیت رجسٹرڈ نہیں ہے، لیکن اس پر اگر کوئی مذہبی عمارت مثلاً مسجد، درگاہ وغیرہ تعمیر ہے تو اس کو توڑا نہ جائے۔ یعنی اس کا اسٹیٹس برقرار رکھا جائے۔ دوسری طرف کانگریس لیڈر طارق انور نے۳۱؍ مارچ کو میڈیا سے بات کرتے ہوئے کہا کہ انہیں امید ہے وقف ترمیمی بل جب پیش کیا جائے گا تو نتیش کمار پارلیمنٹ میں اس کے خلاف رخ اختیار کریں گے۔ یہ اچھا ہے کہ نتیش نے اس روایت کو جاری رکھا ہے جس پر وہ طویل مدت سے عمل کرتے آ رہے ہیں۔ ہم چاہتے ہیں کہ وہ یہ پیغام دیں کہ کوئی دکھاوا نہیں کر رہے ہیں۔ طارق انور نے یہ بھی کہا کہ مسلمانوں سے متعلق معاملوں پر بہار کے وزیر اعلیٰ کو بی جے پی کے راستہ پر نہیں چلنا چاہئے۔ ہمارا ماننا ہے کہ نتیش کمار اور چندرابابو نائیڈو وقف ترمیمی بل کی حمایت نہیں کریں گے۔