سپر اسٹار کے والدکے مطابق سلمان کسی جانور کو معمولی اذیت پہنچانے کے بھی خلاف ہے ، شکار تو دور کی بات ہے

بالی ووڈسپراسٹارسلمان خان کے والد سلیم خان  لارنس بشنوئی پرکافی غصے میں ہیں۔ انہوں نے سلمان خان سے معافی مانگنے کے مطالبہ پر نہایت غصے میں کہا کہ سلمان خان کسی سے معافی کیوں مانگے ؟ اس نے نہ کوئی قتل کیا ہے اور نہ کسی جانور کو مارا ہے۔  بالی ووڈ کے مشہور اسکرپٹ رائٹر سلیم خان نے کہا کہ سلمان نے کبھی کسی جانور کو نہیں مارا۔ سلمان نے کبھی کاکروچ تک نہیں مارا ہے۔ ہم تشدد پر یقین نہیں رکھتے۔ اس لئے جو گناہ کیا ہی نہیں اس کی معافی کا کوئی سوال ہی نہیں پیدا ہو تا۔ سلیم خان نے  اے بی پی نیوز سے بات چیت کے دوران  بالکل دوٹوک انداز میں کہا کہ لوگ ہمیں کہتے ہیں کہ آپ زمین کو دیکھ کر چلتے ہیں، آپ بہت مہذب اور شریف آدمی ہیں۔ میں ان سے کہتا ہوں کہ یہ شریف   اور مہذب ہونے کی بات نہیں ہے، مجھے خدشہ رہتا ہے کہ کوئی کیڑا بھی میرے پیروں کے نیچے آکر زخمی نہ  ہوجائے۔ میں انہیں بھی بچاتا رہتا ہوں۔ ایسے میں کیا میرا بیٹا کسی جانور کو اذیت پہنچاسکتا ہے یا اپنے مزے کیلئے اس کا شکار کرسکتا ہے ؟ اس کا جواب آپ ہی دیں۔ 
 سلیم خان نے بتایا کہ سلمان کی این جی او  ’بینگ ہیومن ‘نے سیکڑوں لوگوں کی مدد کی ہے۔ ہمارے دفتر کے باہر ہر روز لمبی قطاریں لگتی تھیں۔ کسی کو آپریشن کرانا تھا، کسی کو کسی اور مدد کی ضرورت تھی۔ روزانہ چار سو سے زائد لوگ مدد کی امید لے کر آتے تھے اور ہم سب کی مدد کرتے ہیں۔