پارٹی کارکنوںسے خطاب میں کہا کہ وہ پریشان نہ ہوں، کشمیر کے عوام سے چھینا گیا ہر ایک حق وہ واپس لینے کیلئے ایڑی چوٹی کا زور لگادیں گے

جموں کشمیر کے وزیر اعلیٰ عمر عبداللہ کا کہنا ہے کہ وہ کشمیر کے دونوں خطوں کے لوگوں کے چہروں پر دوبارہ مسکراہٹ دیکھنا چاہتے ہیں۔ان باتوں کا اظہار وزیر اعلیٰ نے جموں میں شیر کشمیر بھون میں پارٹی کارکنوں اور لیڈروں سے خطاب کے دوران کیا۔انہوں نے پارٹی کارکنوں سے کہا کہ وہ پریشان نہ ہوں، کیونکہ جموں کشمیر کے عوام سے چھینا گیا ہر ایک حق  واپس لینے کے لئے تمام کوششیں کی جائیں گی۔ انہوں نے کہاکہ جموں کشمیر مرکز کا ایک زیر انتظام علاقہ ہے لیکن پریشان نہ ہوں۔ ہم وہ سب کچھ واپس لے لیں گے جو ہم سے چھین لیا گیا ہے۔
 عمر عبداللہ نے کہا کہ ماضی میں جموں کشمیر کے لوگوں نے دیگر پارٹیوں سے نائب وزیر اعلیٰ دیکھا اور یہ پہلی بار ہے کہ نائب وزیر اعلیٰ کو جموں کے علاقے سے منتخب کیا گیا ہے۔ یہ فیصلہ ان لوگوں کے لئے جواب ہے جو کہتے تھے کہ این سی صرف ایک خاندانی پارٹی ہے۔انہوں نے مزید بتایا کہ نائب وزیر اعلیٰ سریندر چودھری کا میرے اور میرے خاندان سے کوئی تعلق نہیں ہے۔ ہمیں نائب وزیر اعلیٰ کی تقرری کوئی مجبوری نہیں تھی بلکہ ہمارا مقصد یہ تھا کہ جموں کے لوگوں کو یہ واضح پیغام دیا جائے کہ ان کا حکومت میں برابر کا حصہ ہے۔  عمر عبداللہ کے مطابق آج ہمارے پاس ایک وزیر اعلیٰ اور نائب وزیر اعلیٰ دونوں ایک ہی پارٹی سے ہیں۔ یہ ان لوگوں کے لئے جواب ہے جو کہتے تھے کہ این سی صرف مسلمانوں کی پارٹی ہےبلکہ یہ ثابت ہوا ہے کہ تمام طبقات ہمارے ساتھ ہیں۔