افغانستان کرکٹ بورڈ (اے سی بی) نے مجیب الرحمان، فضل الحق فاروقی اور نوین الحق پر `افغانستان کے لئے کھیلنے کے بجائے اپنے ذاتی مفادات کو ترجیح دینے پر پابندی لگا دی ہے۔

افغانستان کرکٹ بورڈ (اے سی بی) نے مجیب الرحمان، فضل الحق فاروقی اور نوین الحق پر `افغانستان کے لئے کھیلنے کے بجائے اپنے ذاتی مفادات کو ترجیح دینے پر پابندی لگا دی ہے۔ اے سی بی نے تینوں کھلاڑیوں کے سالانہ سنٹرل کنٹریکٹ پر ۲۰۲۴ءتک روک لگادی ہے۔ اس کے علاوہ یہ بھی اعلان کیا گیا ہے کہ تینوں کھلاڑیوں کو اگلے ۲؍ سال تک کوئی این او سی (نو آبجیکشن سرٹیفکیٹ) نہیں دیا جائے گا۔ اگر ان کے پاس پہلے سے کسی بھی لیگ میں کھیلنے کیلئے این او سی تھا تو اسے بھی منسوخ کر دیا جائے گا۔ اے سی بی کے بیان کے مطابق تینوں کھلاڑیوں نے حال ہی میں بورڈ سے یکم جنوری ۲۰۲۴ءسے شروع ہونے والے سالانہ سینٹرل کنٹریکٹ سے باہر نکلنے کی خواہش کا اظہار کرتے ہوئے فرنچائزی ٹورنامنٹ میں کھیلنے کی اجازت بھی مانگی تھی۔
بورڈ کے بیان میں کہا گیا ہے ’’ان کھلاڑیوں نے ٹی۔۲۰؍لیگز اور دیگر تجارتی لیگز میں شرکت کے لئے سینٹرل کنٹریکٹ پر دستخط نہیں کئے تھے۔ وہ افغانستان کے لئے کھیلنےکےبجائے اپنے ذاتی مفادات کو ترجیح دے رہے تھے۔ اسی وجہ سے افغانستان کرکٹ بورڈ نے ان کھلاڑیوں کے خلاف تادیبی کارروائی کرنے کا فیصلہ کیا ہے۔
بورڈ نے معاملے کی تحقیقات کیلئے ایک کمیٹی تشکیل دی تھی تاکہ اس کی سفارشات کے مطابق مزید اقدامات کئےجا سکیں ۔ بیان میں مزید کہا گیا کہ `افغانستان کرکٹ بورڈ کا فیصلہ قومی ترجیحات پر توجہ دیتے ہوئے بورڈ کی بنیادی اقدار اور اصولوں کے مطابق کیا گیا ہے۔ اس سے ہر کھلاڑی کو اے سی بی کے اصولوں کو برقرار رکھنے اور اپنے ذاتی مفادات پر ملک کے مفادات کو ترجیح دینے کی ضرورت پر روشنی ڈالی گئی ہے۔
یاد رہے کہ مجیب کو حال ہی میں کولکاتا نائٹ رائیڈرز(کے کے آر) نے آئی پی ایل کی نیلامی میں ۲؍کروڑ روپے میں خریدا تھا۔ وہ فی الحال میلبورن رینیگیڈز ٹیم کے ساتھ بگ بیش لیگ (بی بی ایل) میں ہیں ۔ نوین الحق آئی پی ایل میں لکھنؤ سپر جائنٹس کے ساتھ ہیں اور فضل حق فاروقی سن رائزرس حیدرآباد کے ساتھ ۔ انہوں نے حال ہی میں ابوظہبی ٹی ۔۱۰؍مقابلے میں حصہ لیا تھا۔ یہ تینوں ورلڈ کپ کے دوران افغانستان کی ٹیم کا بھی حصہ تھے۔