آسٹریلیا نے ۲؍میچوں کی ٹیسٹ سیریز میں سری لنکا کوکلین سویپ کیا۔

 آسٹریلیا نے میتھیو کنمین اورناتھن لاین  (۴ ؍وکٹ) کی عمدہ بولنگ اور بلے بازی کی بدولت سری لنکا کو دوسرے ٹیسٹ میچ کے چوتھے دن اتوار کو ۹؍ وکٹ سے شکست دے دی۔ اس کے ساتھ ہی آسٹریلیا نے ۲؍ ٹیسٹ میچوں کی سیریز۰۔۲؍ سے جیت لی ہے۔آسٹریلیا نے سری لنکا کو اس کے  ہوم گراؤنڈ پر۲۰۱۱ء کے بعد پہلی بار سیریز میں شکست دی۔  واضح رہے کہ ورلڈ ٹیسٹ  چمپئن  شپ کا فائنل رواں برس آسٹریلیا اور جنوبی افریقہ کی ٹیموں کے درمیان لارڈس میں کھیلا جائے گا۔
   سری لنکا نے کل ۸؍ وکٹوں پر۲۱۱؍ رن سے دوبارہ کھیل شروع کیا۔ سری لنکا نے صبح کے سیشن میں اپنے سنیچر کے  اسکور میں ابھی ۶؍ رن کا اضافہ کیا تھا جب ناتھن لاین نے کوسل مینڈس (۵۰؍رن) کو آؤٹ کر کے آسٹریلیا کو ۹؍ویں کامیابی دلائی۔ اس کے بعد بو ویبسٹر نے لہیرو کمارا (۹؍رن) کو آؤٹ کر کے سری لنکا کی دوسری اننگز ۲۳۱؍رن پر سمیٹ دی۔  آسٹریلیا کو جیت کے لیے ۷۵؍ رن کا ہدف ملا۔ آسٹریلیا نے یہ ہدف۱۷ء۴؍ اوورس میں ایک وکٹ کے نقصان پر حاصل کر لیا اور اپنی دوسری ٹیسٹ  کامیابی حاصل کر لی۔ آسٹریلیاکا گرنے والا واحد وکٹ ٹریوس ہیڈ(۲۰؍رن) کی تھی۔ انہیں پربھات جے سوریا نے آؤٹ کیا۔ عثمان خواجہ(۲۷؍رن)  اور مارنس لبوشین  ناٹ آؤٹ ۲۶؍رن رہے۔ ۱۵۶؍ رن کی شاندار اننگز کھیلنے والے ایلکس کیری کو `پلیئر آف دی میچ  اور سیریز میں۲۷۲؍ رن بنانے والے آسٹریلیا کے کپتان اسٹیو اسمتھ کو `پلیئر آف دی سیریز  کا اعزاز دیا گیا۔    اس سے قبل سری لنکا نے پہلی اننگز میں دنیش چندیمل (۷۴؍رن) اور کوسل مینڈس (  ناٹ آؤٹ ۸۵؍رن) کی اننگز کی بدولت۲۵۷؍  رن بنائے تھے۔ آسٹریلیا نے پہلی اننگز میں ایلکس کیری (۱۵۶؍رن) اور کپتان اسٹیو اسمتھ (۱۳۱؍رن) کی شاندار اننگز کی بدولت ۴۱۴؍ رن بنائے تھے۔