پنجاب کے افتتاحی بلے باز ابھیشیک شرما نے سید مشتاق علی ٹرافی میں جمعرات کو میگھالیہ کے خلاف ریکارڈ ۲۸؍گیندوں میں سنچری بنائی۔ اس کے ساتھ ہی وہ روی پٹیل کے ساتھ تیز ترین ٹی۔۲۰؍ سنچری بنانے والے ہندوستانی کھلاڑی بن گئے ہیں۔

پنجاب کے افتتاحی بلے باز ابھیشیک شرما نے سید مشتاق علی ٹرافی میں جمعرات کو میگھالیہ کے خلاف ریکارڈ ۲۸؍گیندوں میں سنچری بنائی۔ اس کے ساتھ ہی وہ روی پٹیل کے ساتھ تیز ترین ٹی۔۲۰؍ سنچری بنانے والے ہندوستانی کھلاڑی بن گئے ہیں۔
  ۱۴۳؍رنوں کے ہدف کے تعاقب میں ہرنور سنگھ کے ساتھ اوپنر کے طور پر میدان میں آنے والے ابھیشیک نے شاندار بلے بازی کی اور ۲۹؍گیندوں میں ناٹ آؤٹ ۱۰۶؍رن بنائے۔ انہوں نے اپنی اننگز میں ۸؍ چوکے اور ۱۱؍چھکے لگائے۔ ابھیشیک کی اس جارحانہ اننگز کی بدولت پنجاب نے ۹ء۳؍ اوور میں ۳؍ وکٹ پر ۱۴۴؍رن بنا کر میچ جیت لیا۔ گروپ’ اے‘ میں ۷؍ میچوں میں پنجاب کی یہ پانچویں جیت ہے اور اس جیت کے ساتھ ہی اس نے ناک آؤٹ میں جانے کے لئے اپنے نیٹ رن ریٹ میں بھی اضافہ کیا ہے۔
  ۲۸؍ گیندوں میں بنائی گئی یہ سنچری اب دنیا کی مشترکہ دوسری تیز ترین سنچری ہے۔ تیز ترین سنچری کا ریکارڈ ایسٹونیا کے ساحل چوہان کے نام ہے۔ واضح رہے کہ ساحل چوہان نے رواں سال جون میں قبرص کے خلاف ۲۷؍گیندوں میں سنچری بنائی تھی۔
  اس سے پہلے بلے بازی کرتے ہوئے میگھالیہ نے ۲۰؍اوور میں ۷؍ وکٹ پر ۱۴۲؍رن بنائے تھے۔ میگھالیہ کے ارپت بھٹیورا نے سب سے زیادہ ۳۱؍رن بنائے۔یوگیش تیواری (۲۰)، لیری سنگما (۲۱)، جسکیرت سنگھ (۱۵)، ایبتلانگ تھابہ (۱۷) اور آرین سنگما (۱۳) رن بناکر آؤٹ ہوئے۔