اشون نے کہا کہ آئی پی ایل میں یہ ایک اسٹریٹجک رول ہے اور کھیل کو دلچسپ بناتا ہے اور نئے کھلاڑیوں کو مواقع فراہم کرتا ہے

آف اسپنر آر اشون کا ماننا ہے کہ امپیکٹ پلیئر رول انڈین پریمیر لیگ (آئی پی ایل) میں ایک اسٹریٹجک رول ہے اور یہ کھیل کو دلچسپ بناتا ہے اور نئے کھلاڑیوں کو مواقع فراہم کرتا ہے۔
یوٹیوب شو `چیکی چیکا میں بات چیت کے دوران اشون نے کہاکہ ’’امپیکٹ پلیئر رول اتنا بھی برا نہیں ہے، یہ کرکٹ میں حکمت عملی جیسے عناصر کو زیادہ طاقت دیتا ہے۔ اگرچہ اس کا ایک رخ یہ بھی ہے کہ یہ رول آل راؤنڈرس کو پروموٹ نہیں کرتا ہے، لیکن ایسا کرنے سے کسی کو کوئی روک بھی نہیں رہا ہے۔ یہ نسل ہی ایسی ہے کہ کوئی بھی بلے باز، گیندبازی نہیں کرنا چاہتا اور اس کے برعکس بھی۔ ایسا بھی نہیں ہے کہ امپیکٹ پلیئررول سے آل راؤنڈرس متاثر ہوئے ہیں۔ وینکٹیش ایّر کو ہی دیکھ لیں، وہ کاؤنٹی کرکٹ میں لنکاشائر کےلئے کمال کر رہے ہیں۔ امپیکٹ پلیئر رول کرکٹ میں ایک نئے تجربے کا موقع فراہم کرتا ہے۔
ایک مثال دیتے ہوئے، انہوں نے کہاکہ ’’سن رائزرس حیدرآباد نے شہباز احمد کو امپیکٹ پلیئر کے طورپر لایا اور وہ ۳؍ وکٹ لے کر میچ ونر ثابت ہوئے۔ آئی پی ایل میں، جب اوس موثر ہوتی ہے اور میچ تقریباً یکطرفہ ہو جاتا ہے تو امپیکٹ پلیئر جیسا اصول بولنگ کا ایک اور آپشن اور کھیل کو متوازن کردیتا ہے۔ جب آپ کے پاس ایک اضافی کھلاڑی کا متبادل ہوتا ہے تو میچ زیادہ قریب ہو جاتا ہے۔
انہوں نے کہا کہ اسی اصول کی وجہ سے شہباز احمد، شیوم دوبے اور دھرو جوریل  جیسے کھلاڑی سامنے آئے اور ہندوستانی ٹیم میں جگہ بنائی۔ انہوں نے کہا کہ اگر یہ رول نہیں ہوتا تو جوریل جیسے کھلاڑی کو کبھی موقع ہی نہ ملتا۔ اس اصول کی وجہ سے نئے کھلاڑیوں کو جگہ مل رہی ہے۔