تیز گیندباز نے کہا کہ عثمان نے کوئی جرم نہیں کیا حالانکہ ہمیں آئی سی سی کے ضابطوں کا احترام کرنا چاہئے.

آسٹریلیائی کرکٹ ٹیم کے کپتان پیٹ کمنس نے پیر کو اپنے ساتھی کھلاڑی بلے باز عثمان خواجہ کی حمایت کرتے ہوئے کہا کہ غزہ میں انسانی حالت زار کو اجاگر کرنے کی ٹیم کے افتتاحی بلے باز کی کوشش `’ناگوار‘ نہیں ہے۔ واضح رہے کہ کرکٹ کی عالمی گورننگ باڈی آئی سی سی (انٹرنیشنل کرکٹ کونسل) نے پاکستان کے خلاف `’باکسنگ ڈے‘ ٹیسٹ کے دوران اپنے بیٹ اور جوتوں پر زیتون کی ٹہنی پکڑے کالے `کبوتر کا اسٹیکر لگانے کے خواجہ کے مطالبے کو مسترد کر دیا ہے۔
پیٹ کمنس نے کہا کہ انہیں عثمان خواجہ کے اپنے بیٹ اور جوتوں پر `کبوتر کا ’لوگو‘ استعمال کرتے ہوئے انسانی مسائل کے بارے میں بیداری پیدا کرنے اور ٹیم کے دیگر کھلاڑی مارنس لبوشین کے ذریعے مذہبی پیغام کی عکاسی کرنے کیلئے اپنے بیٹ پر باز کالوگو کا استعمال کرنے میں کوئی فرق نہیں لگتا۔ہم عثمان خواجہ کی حمایت کرتے ہیں ۔ وہ جس چیز پر یقین رکھتے ہیں اس پر قائم ہیں اور مجھے لگتا ہے کہ انہوں نے بہت ہی قابل احترام طریقے سے اس کا مظاہرہ کیا۔ پیٹ کمنس نے مزید کہا کہ ’’جیسا کہ میں نے پچھلے ہفتے کہا تھا، `سبھی کی زندگی اہم ہے۔ مجھے نہیں لگتا کہ اس میں کوئی بہت جارحانہ پیغام ہے اور میں `کبوتر کے بارے میں بھی یہی کہوں گا۔‘‘ 
پاکستان کے شہر اسلام آباد میں پیدا ہونے والے ۳۷؍سالہ عثمان خواجہ کی حمایت کرنے کے باوجود پیٹ کمنس نے کہا’’ ظاہر ہے کہ کچھ اصول موجود ہیں اور مجھے لگتا ہے کہ آئی سی سی نے کہا ہے کہ وہ اسے منظور نہیں کریں گے۔ وہ قوانین بناتے ہیں اور آپ کو اسے قبول کرنا ہوگا۔‘‘ یاد رہے کہ آئی سی سی نے پرتھ میں آسٹریلیا کی پاکستان کے خلاف ۳۶۰؍رنوں کی جیت کے دوران بازو پر سیاہ پٹی باندھنے پر عثمان خواجہ کی سرزنش کی تھی۔