بی سی سی آئی نے نیوزی لینڈ کو شکست دے کر چمپئن ٹرافی کا خطاب جیتنے والی ہندوستانی مرد ٹیم کیلئے۵۸؍کروڑ روپے کے نقد انعام کا اعلان کیا ہے اور یہ رقم انٹرنیشنل کرکٹ کونسل (آئی سی سی) کی انعامی رقم سے ۳؍ گنا زیادہ ہے۔

بی سی سی آئی نے نیوزی لینڈ کو شکست دے کر چمپئن ٹرافی کا خطاب جیتنے والی ہندوستانی مرد ٹیم کیلئے۵۸؍کروڑ روپے کے نقد انعام کا اعلان کیا ہے اور یہ رقم انٹرنیشنل کرکٹ کونسل (آئی سی سی) کی انعامی رقم سے ۳؍ گنا زیادہ ہے۔  بی سی سی آئی کے صدر راجر بنی نے ہندوستانی ٹیم کیلئے۵۸؍کروڑ روپے کی انعامی رقم کا اعلان کرتے ہوئے کہا’’ آئی سی سی کا خطاب جیتنا خاص ہے اور یہ ایوارڈ عالمی سطح پر ہندوستانی ٹیم کی لگن اور بہترین کارکردگی کو ظاہر کرتا ہے۔ یہ نقد انعام، پردے کے پیچھے ہر شخص کی محنت کا احترام ہے۔ یہ آئی سی سی انڈر۔ ۱۹؍ خواتین کرکٹ ورلڈ کپ جیتنے کے بعد ۲۰۲۵ء میں ہماری دوسری آئی سی سی ٹرافی ہے اور یہ ہمارے ملک میں موجود مضبوط کرکٹ سسٹم کی نمائندگی کرتا ہے۔ ‘‘
 آئی سی سی نے پہلے ہی اس چمپئن ٹرافی کے فاتحین کیلئے تقریباً ۱۹ء۳۴؍ کروڑ روپے اور ہر لیگ میچ (سیمی فائنل اور فائنل کو چھوڑ کر) میں جیت کیلئے اضافی تقریباً ۳۵؍لاکھ روپے دینے کا اعلان کیا تھا۔ کل انعامی رقم تقریباً ۹۶ء۵؍ کروڑ روپے تھی، جو ۲۰۱۷ءکے ورژن کے مقابلے میں ۵۳؍فیصد زیادہ تھی۔ آئی سی سی کی جانب سے رنر اپ نیوزی لینڈ کو ۹؍کروڑ ۶۶؍لاکھ روپے دئیے گئے۔ سیمی فائنل میں ہارنے والی جنوبی افریقہ اور آسٹریلیا کی ٹیموں کو تقریباً ۴ء۸۳؍کروڑ روپے ملے۔ اس کے علاوہ تمام ۸؍ ٹیموں کو ایک ایک کروڑ روپے دئیے گئے تھے۔