بدھ کو بیدر، کرناٹک کے گرونانک انجینئرنگ کالج میں طلبہ کے دو گرہوں کے درمیان اس وقت تصادم ہوا جب کالج میں ’’بھارت کا بچہ بچہ جے شری رام بولے گا‘‘ نامی متنازع گیت بجایا گیا اور طلبہ کی جانب سے جے شری رام کے نعرے لگائے گئے۔ ۱۷؍ مسلمان طلبہ کے خلاف ایف آئی آر درج کی گئی ہے۔

بدھ کی سہ پہر کرناٹک کے بیدر میں گرونانک انجینئرنگ کالج میں سالانہ ای بز فیسٹیول کے دوران طلبہ کے درمیان تصادم ہوا۔ تنازع اس وقت شروع ہوا جب ایک اشتعال انگیز گیت، ’’بھارت کا بچہ بچہ جے شری رام بولے گا‘‘، مبینہ طور پر تقریب کا ماحول خراب کرنے کیلئے چلایا گیا۔ اس دوران کچھ طلبہ نے ’’جے شری رام‘‘ کے نعرے بھی لگائے۔ صورتحال اس وقت مزید خراب ہوگئی جب چند طلبہ نے اس گیت پر اعتراض کیا، جس کے نتیجے میں گروپوں کے درمیان جھگڑا شروع ہوگیا اور بات ہاتھا پائی تک آگئی۔ تصادم کے بعد ہندو طلبہ نے ۱۷؍ مسلم طلبہ کے خلاف ایف آئی آر درج کروائی۔

FIR against 17 Muslim students after a clash broke out between #Hindu and #Muslim students during flash mob in college fest in Gurunanak Dev Engineering College, #Mailoor, #Bidar, #Karnataka on Wed afternoon.

Provocative song “Bharat ka baccha baccha Jai Sri Ram bolega” was… pic.twitter.com/OUaru7jz8a

— Hate Detector 🔍 (@HateDetectors) May 29, 2024

بیدر کے ڈپٹی کمشنر گووند ریڈی نے میڈیا کو بتایا کہ یہ تصادم ۲۹؍ مئی کو یوتھ فیسٹیول کیلئے پریکٹس سیشن کے دوران ہوا۔ پریکٹس کے دوران دو (طلبہ) اداکاروں نے اپنے ڈرامے کے ایک حصے کے طور پر ’’جے شری رام‘‘ کا نعرہ لگایا۔ اس پر دوسری کمیونٹی کے کچھ طلبہ نے اعتراض کیا جس کے نتیجے میں نعرہ لگانے والے طلبہ پر حملہ کیا گیا۔ اس جھگڑے میں جلد ہی مزید طلبہ شامل ہو گئے، جس کے نتیجے میں ہاتھا پائی ہونے لگی۔
ڈپٹی کمشنر ریڈی کے مطابق صورتحال اب مکمل طور پر قابو میں ہے اور امتناعی احکامات نافذ کرنے کی ضرورت نہیں ہے۔ سیکوریٹی کو برقرار رکھنے کیلئے کالج کے اطراف پولیس کی نفری بڑھا دی گئی ہے۔کالج انتظامیہ نے اس واقعے کے ردعمل میں یوتھ فیسٹیول کو منسوخ کرنے کا فیصلہ کیا ہے۔ جے شری رام کے نعرے لگانے والے طلبہ کو میڈیکل لیگل کیس کے اندراج کے بعد چیک اپ کیلئے اسپتال لے جایا گیا ہے حالانکہ انہیں اندرونی چوٹ نہیں آئی۔