آسٹریلیا کے خلاف سیریز میں اب تک کل ۲۱؍ وکٹیں لینے والے جسپریت بمراہ ۹۰۴؍ پوائنٹس کے ساتھ سرفہرست پوزیشن پرپہنچے۔

ہندوستان کے اہم تیز گیند باز جسپریت بمراہ نے ٹیسٹ گیند بازی میں۹۰۴؍ ریٹنگ پوائنٹس حاصل کرکے حال ہی میں بین الاقوامی کرکٹ سے ریٹائر ہونے والے روی چندرن اشون کے ریکارڈ کی برابری کر لی ہے۔ بمراہ نے بارڈر گاوسکر ٹرافی میں اب تک کل۲۱؍ وکٹیں حاصل کی ہیں اور اس کی وجہ سے انہوں نے ۴۸؍ ریٹنگ پوائنٹس کے فرق سے ٹاپ پوزیشن پر اپنی برتری بڑھا لی ہے۔ کاگیسو ربادا ۸۵۶؍ ریٹنگ پوائنٹس کے ساتھ دوسرے اور جوش ہیزل ووڈ ۸۵۲؍ریٹنگ پوائنٹس کے ساتھ تیسرے نمبر پر ہیں۔ پیٹ کمنز۸۲۲؍ ریٹنگ پوائنٹس کے ساتھ چوتھے، روی چندرن اشون ۷۸۹؍ریٹنگ پوائنٹس کے ساتھ پانچویں نمبر پر ہیں۔
 اس کے علاوہ میٹ ہنری(۷۸۲) چھٹے، نیتھن لیون(۷۷۰)ساتویں، پربھات جے سوریہ(۷۶۸) آٹھویں، نعمان علی(۷۵۹)  نویں اور رویندر جڈیجہ(۷۵۵)ریٹنگ پوائنٹس کے ساتھ دسویں نمبر پر ہیں۔
 محمد سراج ایک مقام کے فائدہ کے ساتھ ۲۴؍ ویں پوزیشن پر آگئے ہیں جبکہ گزشتہ ٹیسٹ کی پہلی اننگ میں ۱۵۲؍ رن کی اننگ کھیلنے والے ٹریوس ہیڈ یشسوی جیسوال کو پیچھے چھوڑتے ہوئے بلے بازی درجہ بندی میں چوتھے نمبر پر پہنچ گئے ہیں۔ ٹاپ پوزیشن پر جو روٹ کا قبضہ ہے۔
 گابا ٹیسٹ میں ایک دیگر سنچری بنانے والے اسٹیو اسمتھ بھی ٹاپ۱۰؍میں واپس آگئے ہیں۔ اسمتھ نے گزشتہ میچ میں۱۰۱؍ رنوں کی اننگ کھیلی تھی۔ نیز۷۰؍ اور۲۰؍ کی ناقابل تسخیر رنوں کی اننگز کھیلنے والے ایلکس کیری۱۱؍پائیدان  کی چھلانگ کے  ساتھ ۲۹؍ویں نمبر پر پہنچ گئے ہیں۔ ہندوستانی اوپنر کے ایل راہل۱۰؍درجے کی چھلانگ لگا کر۴۰؍ ویں جبکہ رویندر جڈیجہ نو مقام کی چھلانگ لگا کر۴۲؍ ویں نمبر پر پہنچ گئے ہیں۔