پہلے مرحلے کے مقابلے میں بوروشیا ڈورٹمنڈ نے ایک صفر سے کامیابی حاصل کی ، نکولس فلکروگ نے میچ کا واحد گول کیا۔

نکولس فلکروگ کے فیصلہ کن گول کی بدولت بدھ کی دیر رات کھیلے گئے چمپئن لیگ کے سیمی فائنل کے پہلے مرحلے میں بوروسیا ڈورٹمنڈ کو پیرس سینٹ جرمین(پی ایس جی) پر ایک صفرکی اہم برتری حاصل ہوگئی۔ میچ جب شروع ہوا تو دونوں ٹیموں نے شاندار کھیل کا مظاہرہ کیا اور گول کرنے کے مواقع بنائے۔ 
  ڈورٹمنڈکےلئے عثمان ڈیمبلے اور مارسیل سبیتزر کے پاس گول کرنے کے مواقع تھے لیکن انہیں کامیابی نہیں مل سکی۔ کھیل کے ۳۶؍ویں منٹ میں ڈورٹمنڈ کے نیکو شلوٹرباخ نے پی ایس جی باکس میں ایک شاندار کراس پہنچایا جو فلکروگ تک پہنچا انہوں نے پی ایس جی کے گول کیپر گیانلوگی ڈوناروما کو چکمہ دے کر گیند کو گول پوسٹ میں پہنچا دیا اور اپنی ٹیم کو ایک صفر کی برتری دلا دی۔ واضح رہے کہ ۳۱؍سال کی عمر میں فلکروگ اپنا پہلا چمپئن لیگ سیزن کھیل رہے ہیں۔ وہ اس سال ڈورٹمنڈ کیلئے تمام مقابلوں میں ا ب تک ۱۵؍گول کر چکے ہیں۔ ایک گول کرنے کے بعد ڈورٹمنڈ نے پی ایس جی پر دباؤ برقرار رکھا اور ہاف ٹائم تک برتری کو برقرار رکھا۔ 
  بریک کے بعد پی ایس جی نے جارحانہ کھیل کا مظاہرہ کیا اور اپنا حملہ تیز کر دیا۔ کائلین ایمباپے اور اشرف حکیمی نےکچھ ہی منٹوں میں ڈورٹمنڈ کے گول پوسٹ کو نشانہ بنایا لیکن گول کرنے اور برابری حاصل کرنے سے محروم رہ گئے۔ پی ایس جی کی بھرپور کوششوں کے باوجود، ڈورٹمنڈ کی دفاعی صف نے شاندار کھیل کا مظاہرہ کیا اور آخر تک اپنی ایک صفرکی برتری کو برقرار رکھا۔ 
 ۲۰۱۳ء کے بعد پہلی بار فائنل میں جگہ بنانے کی کوشش میں مصروف ۱۹۹۷ء کی فاتح ٹیم ڈورٹمنڈ نے ۸۰؍ہزار شائقین کے سامنے پی ایس جی کو کھیل کے ہر شعبہ میں پچھاڑ دیا۔ گزشتہ ۳؍چمپئن لیگ مقابلوں میں پی ایس جی کے خلاف اپنے گھریلو میدان پر ڈورٹمنڈنے ناقابل شکست رہنے کا ریکارڈ برقرار رکھا۔ گزشتہ ۳؍ مقابلوں میں ڈورٹمنڈ نے پی ایس جی کے خلاف ۲؍میچ جیتے ہیں جبکہ ایک ڈرا رہا ہے۔ دونوں ٹیموں کے درمیان سیمی فائنل لیگ کا دوسرے مرحلے کا مقابلہ آئندہ ہفتے پی ایس جی کے گھریلومیدان پر کھیلا جائےگا۔