دونوں ٹیمیں سیمی فائنل میں ہیں لیکن اس میچ میں جیت حاصل کرکے نفسیاتی برتری حاصل کرنا ان کا مقصد ہوگا۔

ہندوستان اور نیوزی لینڈ جو پہلے ہی چمپئن ٹرافی کے سیمی فائنل کے لیے کوالیفائی کر چکے ہیں، اتوار کو گروپ اے میں سرفہرست رہ کر نفسیاتی برتری حاصل کرنے کیلئے مدمقابل ہوں گے۔ نیوزی لینڈ نے آئی سی سی ٹورنامنٹس میں مسلسل ایک مضبوط طاقت ثابت کی ہے اور اس ایڈیشن میں ان کی کارکردگی بھی اس سے مستثنیٰ نہیں رہی۔ نیوزی لینڈ نے اپنی مہم کا آغاز میزبان پاکستان کے خلاف شاندار جیت کے ساتھ کیا تھا اور اس کے بعد بنگلہ دیش کے خلاف بھی شاندار جیت حاصل کی۔ دوسری طرف، ہندوستان نے بنگلہ دیش پر ایک بڑی جیت کے ساتھ اپنا غلبہ ظاہر کیا اس سے پہلے وراٹ کوہلی کی ماسٹر کلاس اننگز نے ٹورنامنٹ سے روایتی حریف پاکستان کو جلد باہر ہونے کا راستہ دکھایا۔ 
دونوں ٹیموں نے اپنے کھیل کے منصوبوں کو مؤثر طریقے سے انجام دیا ہے، اہم کھلاڑیوں نے اہم لمحات میں ذمہ دارانہ کارکردگی کا مظاہرہ کیا ہے۔ مائیکل بریسویل نے بنگلہ دیش کے خلاف نیوزی لینڈ کی جیت میں شاندار کردار ادا کیا، بالنگ اٹیک سے بھرپور تعاون ملا۔ ہندوستان کے اسپنروں نے پاکستان کے بازوں پر زبردست دباؤ بنائے رکھا اور فیصلہ کن کردار ادا کیا جب کہ کوہلی کی شاندار سنچری نے ان کی فارم میں واپسی کو نمایاں کیا۔ اس کے علاوہ راچن رویندرا نے شاندار سنچری کے ساتھ ریکارڈ بک میں اپنا نام درج کرایا۔ 
سیمی فائنل میں جگہ حاصل کرنے کے بعد ہندوستان آئندہ مقابلے کیلئے کپتان روہت شرما اور تیز گیند باز محمدسمیع کو آرام دینے کا انتخاب کر سکتا ہے۔ تاہم، کوہلی کی موجودگی مچل سینٹنر کی قیادت میں نیوزی لینڈ کے بولنگ اٹیک کیلئے ایک بڑا چیلنج ہوگا۔ پاکستان کے خلاف سابق ہندوستانی کپتان کی شاندار اننگز نے بڑے مقابلےپر اچھی کارکردگی کا مظاہرہ کرنے کی ان کی صلاحیت کو ثابت کیا ہے۔ 
دریں اثنا، رویندر نیوزی لینڈ کیلئےبہترین کارکردگی کا مظاہرہ کرنے والے کھلاڑی رہے ہیں ۔ بنگلہ دیش کے خلاف ۲۵؍ سالہ کھلاڑی کی میچ جیتنے والی ۱۱۲؍ رن کی اننگز نے آئی سی سی ٹورنامنٹس میں آگے بڑھنے کی ان کی صلاحیت کو دکھایا ہے، اس طرح کے مقابلوں میں ان کی چوتھی سنچری ہے۔ ان کی فارم نیوزی لینڈ کیلئے اہم ہو گی کیونکہ وہ ہندوستانی گیندبازی حملے کو چیلنج دینا چاہیں گے۔ 
دونوں ٹیموں کے پاس زبردست بالنگ اٹیک ہے۔ جہاں بریسویل اور ولیم اورورک نے نیوزی لینڈ کی قیادت کی ہے، ہندوستان نے سمیع اور ہرشیت رانا کی تیز گیند بازی جوڑی پر انحصار کیا ہے۔ آنے والا مقابلہ دونوں فریقوں کے لیے ایک اہم امتحان ثابت ہوگا۔ ہندوستان کے نائب کپتان شبھ من گل ٹورنامنٹ کے غیر معمولی بلے بازوں میں سے ایک رہے ہیں۔ ۲۵؍سالہ کھلاڑی نے اپنی مہم کا آغاز بنگلہ دیش کے خلاف سنچری کے ساتھ کیا اور اس کے بعد پاکستان کے خلاف اہم ۴۶؍ رن بنائے۔ ماضی میں نیوزی لینڈ کے خلاف شاندار کارکردگی دکھانے کے بعد گل کے ۲۰۲۳ء ورلڈ کپ سیمی فائنل میں ناٹ آؤٹ ۸۰؍ رن بھی شامل ہیں۔ نیوزی لینڈ نے آئی سی سی ایونٹس میں ہندوستان کو پریشان کیا ہے لیکن ٹیم انڈیا نے ۲۰۲۳ء میں اپنی سیمی فائنل جیت کے ساتھ اس سلسلے کو ختم کر دیا۔ دونوں ٹیموں کے سیمی فائنل میں پہنچنے کے ساتھ، آنے والے مقابلہ گروپ کے لیڈر کا تعین کرے گا۔ ہندوستان اپنی موجودہ فارم کے ساتھ برتری بنائے ہوئے ہے اور اس کا مقصد ناقابل تسخیر برتری کو برقرار رکھنا ہوگا۔ میچ دوپہرڈھائی بجے شروع ہوگا۔