افغانستان نے۸؍رنوں کی شاندار فتح کیساتھ چمپئن ٹرافی کے سیمی فائنل میں پہنچنے کی امید کو برقرار رکھا، انگلینڈ کے جو روٹ کی سنچری رائیگاں، عمرزئی نے ۵؍وکٹیں حاصل کیں۔

ابراہیم زدران کی (۱۷۷) ریکارڈ سنچری اننگزاور عظمت اللہ عمرزئی (۵۸؍رن پر ۵؍وکٹ) کی بدولت افغانستان نے انگلینڈ کو ایک سنسنی خیز مقابلے میں ۸؍ رنوں سے شکست دے کر چمپئن ٹرافی سے باہر کر دیا۔ افغانستان نے پہلے بلے بازی کرتے ہوئے مقررہ ۵۰؍ اووروں ۷؍وکٹوں کے نقصان پر۳۲۵؍ رنوں کا پہاڑ کھڑا کر دیا تھا۔ اس کے جواب میں انگلینڈ کی ٹیم ۴۹ء۵؍اووروں میں ۳۱۷؍رن پر آل آؤٹ ہوگئی۔ یہ انگلینڈ کی افغانستان کے خلاف مسلسل دوسری شکست ہے۔ اس سے قبل افغان ٹیم نے ۲۰۲۳ءکے ون ڈے ورلڈ کپ میں انگلینڈ کو ۶۹؍ رنوں سے شکست دی تھی۔ 
ابراہیم زدران اور عظمت اللہ عمرزئی افغانستان کی جیت کے ہیرو رہے۔ زدران کی ۱۷۷؍رنوں کی سنچری نے افغانستان کو ایک مشکل ہدف دینے میں اہم کردار ادا کیا۔ یہ کسی بھی افغان کھلاڑی کا ون ڈے میں سب سے زیادہ انفرادی اسکور ہے۔ زدران نے اس سے قبل ۲۰۲۲ءمیں سری لنکا کے خلاف ۱۶۶؍رن بنائے تھے۔ یہاں انہوں نے اپنا یہ ریکارڈ بھی توڑ دیا۔ 
جو روٹ (۱۲۰) نے انگلینڈ کو فتح کے دہانے پر لے جانے کی پوری کوشش کی لیکن ۴۶؍ویں اوور میں عمرزئی نے انہیں آؤٹ کرکے انگلینڈ کے امکانات ختم کردیئے۔ جو روٹ نے ۱۱۱ظگیندوں کی اپنی اننگز کے دوران ۱۱ظچوکے اور ایک چھکا مارا۔ یہاں قابل ذکر بات ہے کہ جو روٹ نے ۲؍ہزار۹؍دنوں کے بعدیکروزہ میچ میں سنچری بنائی۔ اس سے قبل انہوں نے ۲۰۱۹ء میں ویسٹ انڈیز کیخلاف سنچری اسکور کی تھی۔ جیمی اوورٹن (۳۲) اور جوفرا آرچر (۱۴) نے آخری اووروں میں عمدہ شاٹس کھیل کر میچ میں جوش و خروش واپس لانے کی کوشش کی لیکن بالآخر وہ افغانستان سے اور ایک اور شکست کو ٹال نہ سکے۔ 
انگلینڈ اپنے ۲؍ میچ ہارنے کے بعد چمپئن ٹرافی سے باہر ہو گیا ہے۔ اب گروپ’ بی‘ میں ٹاپ۔ ۲؍میں جگہ بنانے کےلئے آسٹریلیا، جنوبی افریقہ اور افغانستان کے درمیان مقابلہ ہوگا۔ 
اس سے پہلے قذافی اسٹیڈیم میں افغانستان صرف ۳۷؍ رنوں پر ۳؍وکٹیں گنوانے کے بعد مشکلات کا شکار تھا تاہم زدران نے کپتان حشمت اللہ شاہدی (۴۰) کے ساتھ مل کر ۱۰۳؍رنوں کی شراکت کرکے ٹیم کو بحران سے نکالا جبکہ بعد ازاں عظمت اللہ عمرزئی (۴۱) کے ساتھ ۷۲؍رن اور محمد نبی (۴۰) نے ۱۱۱؍ رنوں کی شراکت کرکے انگلینڈ کو بیک فٹ پر لا دیا۔ 
اننگز کے آخری اوور میں لیام لیونگسٹون کی گیند پر آؤٹ ہونے سے قبل زدران نے اپنی یادگار اننگز میں ۱۲؍چوکے اور۶؍ چھکے لگائے۔ انگلینڈ کی جانب سے جوفرا آرچر سب سے کامیاب گیندبازرہے جنہوں نے ۳؍ وکٹیں حاصل کیں جبکہ لیونگ اسٹون نے ۲؍وکٹ حاصل کیں۔