کرسٹیانو رونالڈو نے سعودی پرو لیگ کی ٹیم النصر فٹبال کلب کے ساتھ اپنے دو سالہ معاہدہ کی سالگرہ کے موقع پر اعلان کیا ہے کہ وہ زیادہ سے زیادہ خطاب کے بھوکے ہیں۔

کرسٹیانو رونالڈو نے سعودی پرو لیگ کی ٹیم النصر فٹبال کلب کے ساتھ اپنے دو سالہ معاہدہ کی سالگرہ کے موقع پر اعلان کیا ہے کہ وہ زیادہ سے زیادہ خطاب کے بھوکے ہیں۔ پرتگال کے کپتان، جنہیں حال ہی میں گلوب ساکر ایوارڈس میں ۲۰۲۴ء کا بہترین مشرق وسطیٰ کا کھلاڑی قرار دیا گیا ہے، مانچسٹر یونائٹیڈ چھوڑنے کے بعد جنوری۲۰۲۳ء میں فری لون منتقلی پر شامل ہونے کے بعد سے اب تک۸۳؍ گیمز میں ۷۴؍ گول کر چکے ہیں۔ 
ریاض میں اپنے وقت کی عکاسی کرتے ہوئے، رونالڈو، جو۵؍ فروری کو۴۰؍سال کے ہو جائیں گے، نے لیگ کے اندرونی میڈیا چینل کو بتایاکہ ’’میں خوش ہوں اور میرا خاندان خوش ہے۔ ہم نے اس خوبصورت ملک میں ایک نئی زندگی شروع کی۔ زندگی اچھی ہے، فٹ بال اچھاہے۔ ‘‘
انہوں نے کہا کہ ’’انفرادی طور پر اور اجتماعی طور پر، ہم اب بھی اسی جگہ پر ہیں، ہم اب بھی بہتر ہو رہے ہیں۔ ‘‘ رونالڈو، جنہوں نے اپنے کریئر میں ۹۰۰؍ سے زیادہ گول کئے ہیں اور سب سے زیادہ بین الاقوامی گول کرنے کا عالمی ریکارڈ اپنے نام کیا ہے، کا خیال ہے کہ سعودی پرو لیگ ان کی آمد کے بعد سے درست سمت میں آگے بڑھ رہی ہے۔ 
پرتگال کے اسٹار کھلاڑی نے کہا کہ یہ میرے لیے اعزاز کی بات ہے کہ لیگ بڑھ رہی ہے اور لیگ کو بہتر اور مسابقتی بنانے کے لیے بہت سارے اسٹار کھلاڑی آ رہے ہیں۔ یہ پہلا شخص بننا ایک اعزاز کی بات ہے، لیکن میں جس چیز کا منتظر ہوں وہ یہ ہے کہ لیگ اگلے پانچ سے دس برسوں میں نہ صرف پہلی ٹیموں بلکہ اکیڈمیز کے طور پر بہتر کارکردگی کامظاہرہ کرے۔ 
پرتگال کے کھلاڑی کرسٹیانو رونالڈو نے کہا کہ یہ میرا خواب ہے، نہ صرف سعودی (کھلاڑیوں ) اور لیگ کے مستقبل کے لیے، بلکہ ملک کے لیے اور دیگر لیگز کے ساتھ مقابلہ کرنا اور میں ملک اور لیگ کو اس سطح تک پہنچانے میں مدد کرنے کی کوشش کروں گا۔ لوگ کرسٹیانو کو ایک مثال کے طور پر دیکھتے ہیں، نہ صرف میدان میں، بلکہ میدان سے باہر بھی۔ 
النصر میں شامل ہونے کے بعد سے، رونالڈو نے۲۰۲۳ء میں عرب کلب چمپئن کپ جیتا ہے۔ پچھلے سیزن میں سلور ویئر سے محروم ہونے کے باوجود، انہوں نے اپنی پہلی مکمل مہم میں سعودی پرو لیگ کے لئے ریکارڈ۳۵؍ گول کیا۔ کرسٹیانو رونالڈو نے کہا کہ آپ جانتے ہیں کہ جب آپ خطاب جیتتے ہیں تو چیزیں آسان ہوجاتی ہیں اور یہاں اپنے پہلے سال میں پہلی ٹرافی جیتنے کا اعزاز حاصل کرنا حیرت انگیز تھا۔ لیکن میں مزید چاہتا ہوں۔ میں اپنی ٹیم النصر کو ٹائٹل جیتنے کے لیے حوصلہ افزائی اور مدد کرتا رہوں گا۔ مجھے یقین ہے کہ یہ سال النصر کے لیے اچھا رہے گا۔ النصر سعودی پرو لیگ میں چوتھے نمبر پر ہے، لیگ کے لیڈر الاتحاد سے۱۱؍ پوائنٹس پیچھے ہے۔ 
رونالڈو نے کہا کہ الہلال اور الاتحاد جیسی ٹیموں سے مقابلہ کرنا مشکل ہے لیکن ہم اب بھی وہاں ہیں، کوشش کر رہے ہیں اور لڑ رہے ہیں۔ فٹ بال ایسا ہی ہے، آپ کے پاس اچھے اور برے لمحات ہوتے ہیں، لیکن میرے لیے سب سے اہم چیز پیشہ ور بننا ہے، سخت محنت کرنا، کلب کا احترام کرنا، اپنے معاہدے کا احترام کرنا اور یقین کرنا کہ چیزیں بدل جائیں گی - النصرکے لئے زیادہ ٹائٹل جیتنے کی کوشش کرنا۔ انہوں نے کہا کہ ’’میں کلب کے لیے (اے ایف سی) چمپئن لیگ جیتنا چاہتا ہوں، لیکن سب سے اہم بات یہ ہے کہ کوشش کرتے رہنا اور پیشہ ور رہنا ہے۔ ‘‘ کرسٹیانو رونالڈو نے مانچسٹر یونائٹیڈ سے اپنے کامیاب کریئر کا آغاز کیاتھا اور اس کے بعد وہ اسپین کے معروف فٹبال کلب ریئل میڈرڈ میں شامل ہوگئے تھے۔ اس کے بعد انہوں نے اٹلی کے کلب یووینٹس میں شمولیت اختیار کی اور وہاں بھی خطاب جیتے تھے۔