اے ایف سی چمپئن لیگ ایلیٹ کے میچ میں النصر فٹبال کلب نے ایک کے مقابلے ۳؍گول سے کامیابی حاصل کی۔ رونالڈو کے ساتھ ہی انجیلو گیبرئیل نے بھی ایک گول کیا۔

اے ایف سی چمپئن لیگ کے ایلیٹ گروپ کے مغربی زون کے میچ میں النصر فٹبال کلب  نے الغرافہ فٹبال کلب کو ایک کے مقابلے ۳؍گول سے شکست دے دی۔ اس میچ میں پرتگال سے تعلق رکھنے والے اسٹار کھلاڑی کرسٹیانو رونالڈو نے۲؍گول کئے اور اپنی ٹیم کی فتح میں اہم رول اداکرتے ہوئے ۳؍پوائنٹس لئے۔
 پیر کی دیر رات ہونے والے میچ میں میچ کا پہلا ہاف بغیر گول کے ختم ہوگیا۔ میچ کے دوسرے ہاف میں النصر فٹبال کلب نے حریف ٹیم کے میدان پر زبردست مقابلہ کیا اور یکے بعد دیگرے ۳؍ گول کر ڈالے۔ ۴۶؍ویں منٹ میں الغنم کی مدد سے رونالڈو نے پہلا گول کیا۔ ۵۸؍ویں منٹ میں اوٹاویو کی مدد سے انجیلو گیبرئیل نے دوسرا گول کیا۔ ۶۴؍ویں منٹ میں رونالڈو نے ٹیم کا تیسرا اور اپنا گول کرکے اسکور ۰۔۳؍گول کردیا۔ ۷۵؍ویں منٹ میں الغرافہ نے واپسی کی کوشش کی اور اس کی جانب سے جوسیلو نے واحد گول کیا۔ اس فتح کے بعد ٹیبل پر النصر کی ٹیم دوسری پوزیشن پر ہے۔ اس کے ۵؍میچوں میں ۱۳؍ پوائنٹس ہیں۔ الاہلی کلب کے  اتنے ہی میچوں میں ۱۵؍پوائنٹس ہیں اور وہ ٹاپ پر ہے۔ الاہلی نے العین کو ۱۔۲؍گول سے ہرادیا تھا۔