شیفالی ورما (۴۳؍رن) کے طوفانی انداز کے بعد نکی پرساد (۳۵؍رن) کی شاندار اننگز کی بدولت دہلی کیپٹلس نےکامیابی حاصل کی

  شیفالی ورما (۴۳؍رن)  کے طوفانی انداز کے بعد نکی پرساد (۳۵؍رن) کی شاندار اننگز کی بدولت دہلی کیپٹلس نے سنیچر کو ویمنز پریمیر لیگ (ڈبلیو پی ایل) کے ایک میچ میں ممبئی انڈینس کے خلاف ۲؍ وکٹ  سے سنسنی خیز  کامیابی حاصل کی۔ 
 ممبئی انڈینس نے پہلے بیٹنگ کرتے ہوئے ۱۶۴؍ رن بنائے جس کے جواب میں دہلی کیپٹلس نے اننگز کی آخری گیند پر ۲؍وکٹ باقی رہتے  ۱۶۵؍ رن کا ہدف حاصل کرلیا۔ دہلی کی جیت میں شیفالی اور نکی کے علاوہ سارہ برائس (۲۱؍رن) اور رادھا یادو (۹؍رن) نے بھی اہم کردار ادا کیا جنہوں نے آخری گیند تک جدوجہد کی اور ممبئی کے جبڑے سے جیت چھین لی۔ شیفالی نے اپنے بے خوف انداز میں اننگز کا آغاز کیا اور پاور پلے کا بھرپور فائدہ اٹھاتے ہوئے میدان کے چاروں طرف چوکوں  اور چھکوں کی بوچھار کردی۔ انہوں نے اپنی۱۸؍ گیندوں کی مختصر اننگز میں ۲۳۳؍ کے اسٹرائیک ریٹ سے  بنایا لیکن ان کے آؤٹ ہونے کے بعد ان کی ساتھی میگ لیننگ (۱۵؍ رن) بھی آؤٹ ہوگئیں۔
 وکٹ گرنے کے باوجود دہلی کے بلے بازوں نے اپنے جارحانہ انداز میں کمی نہیں آنے دی، جس کے نتیجے میں مخالف گیند باز رن ریٹ کو روکنے میں ناکام رہے۔ آخری اوور باقاعدہ تیز گیندباز صاعقہ اسحاق کی جگہ سجیون سنجنا کو دیا گیا، جنہوں نے ایک وکٹ لے کر ممبئی کی امیدیں بڑھا دیں، لیکن نئی بلے باز اروندھتی ریڈی نے آخری گیند پر دو رن چرا کر میچ کو اپنی ٹیم کے حق میں کر دیا۔
 اس سے قبل ٹاس ہار کر پہلے بلے بازی کرنے اتری ممبئی کو ہیلی میتھیوز (صفر) کی صورت میں پہلا جھٹکا پہلے ہی اوور میں لگ گیا تھا  تاہم میتھیوز کی جگہ بلے بازی کرنے اتری برنٹ نے ایک سرے پر رک کر اپنے جارحانہ انداز سے مخالف گیند بازوں کے حوصلے پست کرنا شروع کیا۔ اس دوران دہلی کو ایک اور کامیابی یستیکا بھاٹیہ (۱۱)  کی شکل میں ملی جنہیں شیکھا پانڈے نے اپنا دوسرا شکار بنایا۔
 دوسری جانب کپتان ہرمن پریت نے کریز پر آتے ہی مخالف گیند بازوں کی پٹائی شروع کردی۔ برنٹ اور ہرمن پریت نے اگلے ۶؍ اوورس میں۱۲؍ کے اسٹرائیک ریٹ سے۷۳؍ رن بنائے۔ ہرمن پریت کو اینابیل سدرلینڈ نے آؤٹ کیا، حالانکہ آؤٹ ہونے سے پہلے وہ۲۲؍ گیندوں میں ۴؍ چوکے اور ۳؍ چھکے لگاچکی تھیں۔
 ہرمن کے آؤٹ ہونے کے بعد دہلی کیپٹلس نے ممبئی کے رن کی رفتار پر نہ صرف  بریک لگایا بلکہ وقفے وقفے سے وکٹ بھی حاصل کئے۔ دوسرے کنارے پر  برنٹ نے گیند کو باؤنڈری لائن کے پار بھیجنا جاری رکھا، جس سے ممبئی کی ٹیم ایک شاندار اسکور کھڑا کرنے میں کامیاب ہوسکی۔ دہلی کیلئے  سدرلینڈ ۳۴؍ رن پر ۳؍ وکٹ لے کر سب سے کامیاب گیندباز رہیں، جب کہ شکھا پانڈے نے دو اور ایلس کیپسی اور منو منی نے ایک ایک وکٹ لیا۔