چنئی سپرکنگز کے سابق کپتان نے کہا:وہ موجودہ ایڈیشن کے بعد اپنی فٹنیس کی بنیاد پر اگلے سیزن میں کھیلنے کا فیصلہ کریں گے

 ہندوستان کے سابق کپتان اور چنئی سپر کنگز (سی ایس کے) کے کپتان مہندر سنگھ دھونی نے اتوار کو انڈین پریمیر لیگ (آئی پی ایل) سے ریٹائرمنٹ کی قیاس آرائیوں کو مسترد کرتے ہوئے کہا کہ وہ موجودہ ایڈیشن کے بعد اپنی فٹنیس کی بنیاد پر اگلے سیزن میں کھیلنے کا فیصلہ کریں گے۔
پوڈ کاسٹ میں آئی پی ایل سے ریٹائرمنٹ کے بارے میں پوچھے گئے سوال کے جواب میں دھونی نے کہاکہ ’’میں اب بھی آئی پی ایل میں کھیل رہا ہوں اور میں نے اسے بہت آسان رکھا ہے، میں ایک وقت میں ایک سال کھیلتا ہوں، میں اس وقت ۴۳؍ سال کا ہوں اور جولائی میں اس سیزن کے ختم ہونے تک میں۴۴؍ سال کا ہو جاؤں گا۔ اس لئے  میرے پاس یہ فیصلہ کرنے کیلئے  تقریباً۱۰؍ ماہ ہیں کہ آیا میں ایک اور سال کھیلنا چاہتا ہوں یا نہیں۔ ‘‘
انہوں نے کہا کہ ’’میں واقعی اس کے بارے میں نہیں جانتا کہ میں کیا چاہتا ہوں۔ یہ جسم ہے جو آپ کیلئے  فیصلہ کرتا ہے۔ میں کرکٹ جاری رکھ سکتا ہوںیا نہیں اس کا انحصار اس بات پر ہے کہ میں جسمانی طور پر کیسا محسوس کرتا ہوں۔ فی الحال، میں پوری طرح اس بات پر مرکوز ہوں کہ اس سیزن میں کیا کرنے کی ضرورت ہے۔‘‘
موجودہ آئی پی ایل سیزن میں دھونی کی معمولی کارکردگی کے درمیان ریٹائرمنٹ کی بحث زور پکڑ رہی ہے۔ اگرچہ تجربہ کار وکٹ کیپر بلے باز ۴؍ میچوں میں صرف ایک بار آؤٹ ہوئے ہیں، لیکن اس نے ابھی تک بلے سے زیادہ اثر نہیں دکھایا اور نہ ہی کسی اننگز کو مکمل طور پر ختم کیا۔ دہلی کیپٹلس کے خلاف میچ میں دھونی نے ۲۶؍گیندوں پر۳۰؍ رن بنائے جبکہ چنئی سپر کنگز کو۵۰؍ رن سے شکست کا سامنا کرنا پڑا۔ اپنے پہلے ۴؍ میچوں میں سے صرف ایک جیت کے ساتھ سی ایس کے دباؤ میں ہے اور انہیں اس سیزن میں ٹاپ ۴؍ میں جگہ بنانے کیلئے کئی ایڈجسٹمنٹ کرنا ہوں گی۔
اپنے کرکٹ سفر کے بارے میں بات چیت کرتے ہوئے دھونی نے کہا کہ کرکٹ کی دنیا میں ان کی کامیابی ان گنت افراد کی محنت اور حمایت کا نتیجہ ہے۔ انہوں نے کہا کہ میرے اسکول کے زمانے سے ہی میرے والدین، میرے کھیلوں کے اساتذہ اور جن لوگوں کے ساتھ میں نے اپنے ابتدائی میچ کھیلے ان سب نے اس میں کردار ادا کیا۔ یہاں تک کہ ٹینس بال کرکٹ نے مجھے بہت سی چیزیں سکھائیں، حالانکہ اس میں کچھ عجیب چیزیں بھی ہیں۔