امریکہ کے کالابساس علاقے میں اتوار کے روز ہوئے ایک ہیلی کاپٹر کے حادثے میں نیشنل باسکٹ بال ایسوسی ایشن (این بی اے) کے سابق کھلاڑی کوبی برائنٹ سمیت ۹؍ دیگر افراد ہلاک ہوگئے۔

کیلیفورنیا : امریکہ کے کالابساس علاقے میں اتوار کے روز ہوئے ایک ہیلی کاپٹر کے حادثے میں نیشنل باسکٹ بال ایسوسی ایشن (این بی اے) کے سابق کھلاڑی کوبی برائنٹ سمیت ۹؍ دیگر افراد ہلاک ہوگئے۔لاس اینجلس کاؤنٹی شیریف الیکس ولانویوا نے اس بات کی تصدیق کرتے ہوئے کہا باسکٹ بال کے عظیم کھلاڑی کوبی برائنٹ کے ساتھ ہیلی کاپٹر میں سوار دیگر نوافراد کی بھی موت ہوگئی ہے۔ 
این بی اے نے بھی تصدیق کی ہے کہ اس حادثے میں کوبی برائنٹ اور ان کی بیٹی گیانا ماریا (۱۳) کی بھی موت ہوگئی ہے۔ ولانویوا نے بتایا کہ فیڈرل ایوی ایشن ایڈمنسٹریشن (ایف اے اے) جائے وقوع پر موجود ہے اور حادثے کی وجوہات کا پتہ لگانے کے لئے تحقیقات کی جارہی ہے۔
اطلاعات کے مطابق ہیلی کاپٹر حادثے میں كوبي برائنٹ اور ان کی بیٹی سمیت پائلٹ کی بھی موت ہو گئی ہے۔ بتایا جا رہا ہے کہ یہ حادثہ اس وقت ہوا جب  برائنٹ اور دیگر لوگ ایک باسکٹ بال مقابلے کیلئے سكورسكي ایس ۷۶؍ بی ہیلی کاپٹر سے جا رہے تھے۔  ابتدائی رپورٹوں کے مطابق حادثے کی وجہ ہیلی کاپٹر میں آگ لگنا بتایا جا رہا ہے۔
كوبي نیشنل باسکٹ بال ایسوسی ایشن (این بی اے ) میں ۲۰؍سال رہے اور اس دوران انہوں نے پانچ مرتبہ چمپئن شپ جیتی۔
 سابق امریکی صدر براک اوباما سمیت کئی بڑی شخصیتوں نے كوبي برائنٹ کی موت پرغم کا اظہار کیا۔