ہندوستان کی ٹیم کے اسٹار کھلاڑی آج انگلینڈ سے مقابلہ کرنے کے لئےتیار۔ اسٹار بلے باز جوروٹ کی شمولیت سے انگلینڈ کے حوصلے بھی بلند۔

ٹی۲۰؍ سیریز جیتنے کے بعد پرجوش ہندوستانی کرکٹ ٹیم انگلینڈ کے خلاف جمعرات سے شروع ہونے والی ۳؍ میچوں کی سیریز کے پہلے ایک روزہ  مقابلے کو جیت کر برتری حاصل کرنے کے ارادے سے اترے گی۔
  چمپئن ٹرافی سے قبل ۳؍ میچوں کی یہ سیریز دونوں ٹیموں کیلئے اہم ہے۔ گزشتہ سال باربڈوس میں آئی سی سی کا خطاب جیتنے والی ہندوستانی ٹیم سے ایک بار پھر بہتر کارکردگی کی امید ہے۔ وہیں ٹی ۲۰؍ سیریز میں مایوس کن شکست کے بعد انگلینڈ  فارم حاصل کرنے کی کوشش کریگا۔
 ہندوستان نے۲۰۲۳ءورلڈ کپ کے بعد سے صرف ۶؍ ون ڈے کھیلے ہیں لیکن اپنی اہم ٹیم کے بیشتر کھلاڑیوں کو برقرار رکھا ہے۔ کپتان روہت شرما اور اسٹار بلے باز وراٹ کوہلی ۵۰؍ اوور کے فارمیٹ میں فارم حاصل کرنا چاہیں گے۔ ہندوستانی ٹیم میں اسپنرس کو جگہ دی گئی  جبکہ زخمی جسپریت بمراہ کی جگہ ہرشیت رانا کو ٹیم میں شامل کیا گیا ہے۔ بمراہ انجری کی وجہ سے پہلے دو ون ڈے میچوں سے باہر ہوں گے، بمراہ کے دستیاب نہ ہونے کی وجہ سے تیز گیند بازی کی ذمہ داری عرشدیپ سنگھ اور نئی گیند سے واپسی کرنے والے محمد سمیع پر ہوگی۔
 ہندوستان کی تیاریوں کے بارے میں بات چیت کرتے ہوئے کپتان روہت شرما نے کہا کہ وہ دباؤ میں ٹیم کی اچھی کارکردگی کا مظاہرہ کرنے کی صلاحیت پر پراعتماد ہیں۔ روہت نے کہا کہ ہمیں کھلاڑیوں کی دستیابی کے بارے میں یقین نہیں ہے، اس لیے ہم ٹیم میں توازن کو یقینی بنانا چاہتے تھے۔ ہمیں نئی گیند کے ساتھ ساتھ نچلے آرڈر پر گیندبازی کرنے والے کسی شخص کی ضرورت تھی۔ انہوں نے کہا کہ نئی گیند کے ساتھ سمیع کی کارکردگی قابل ذکر رہی ہے۔ ادھر انگلینڈ کی ٹیم جو روٹ کی واپسی سے پرجوش ہے۔ روٹ انگلینڈ کے مڈل آرڈر میں ایک اہم کھلاڑی ہیں۔ کپتان جوس بٹلر نے ٹیم کے لیے روٹ کی اہمیت کو تسلیم کرتے ہوئے کہا کہ وہ دنیا کے بہترین کھلاڑیوں میں سے ایک ہیں اور ان کا واپس آنا بہت اچھا ہے۔ ون ڈے فارمیٹ مختلف ہے، لیکن کھیل ترقی کر رہا ہے اور ٹی ۲۰؍ کرکٹ کے قریب ہو رہا ہے۔ ہم اس سیریز کے لیے پرجوش ہیں۔ عالمی ٹورنامنٹ  چمپئن  ٹرافی سے قبل دونوں ٹیموں کا مقصد اپنی حکمت عملیوں کو بہتر بنانا ہے، اس لئے ۳؍ میچوں کی سیریز میں سنسنی خیز سخت ٹکر دیکھنے کو ملے گی۔ دونوں زبردست مقابلہ متوقع ہے۔