ٹیم انڈیا کے ہیڈ کوچ نے کہاکہ ہندوستان، نیوزی لینڈ کے خلاف ۳؍ میچوں کی گھریلو ٹیسٹ سیریز کیلئے تیار ہے۔

 ہندوستانی کرکٹ ٹیم کے کوچ گوتم گمبھیر نے اسٹار بلے بازوراٹ کوہلی کی تعریف کرتے ہوئے کہا ہے کہ ان میں رن بنانے کی بھوک پہلے کی طرح برقرار ہے اور ایک دہائی سے زیادہ وقت گزرنے کے بعد بھی ان کے اندر رن بنانے کی خواہش کم نہیں ہوئی ہے۔ 
  ٹیم انڈیا کے سابق سلامی بلے بازگوتم گمبھیر نے نیوزی لینڈ کے خلاف چناسوامی اسٹیڈیم میں ۱۶؍ اکتوبر سے شروع ہونے والے پہلے ٹیسٹ سے قبل کوہلی کی لگن کی تعریف کی۔ وراٹ ٹیسٹ کرکٹ میں ۹۰۰۰؍ رن بنانے کے قابل ذکر سنگ میل کو حاصل کرنے کے بہت قریب ہیں.
  ٹیم انڈیا کے ہیڈ کوچ گمبھیر نے وراٹ کے ابتدائی دنوں کو یاد کرتے ہوئے، ایک سوال کا جواب دیتے ہوئے کہاکہ ’’مجھے سری لنکا میں اپنے پہلے ٹیسٹ میں ان کے ساتھ اوپننگ کرنا یاد ہے۔ ان کی رن بنانے کی بھوک ہمیشہ رہتی ہے اور یہی چیز انہیں عالمی معیار کا کرکٹر بناتی ہے۔ وراٹ اپنے عزم کے لئے جانے جاتے ہیں اور انہوں نے مسلسل ثابت کیا ہے کہ ان کی کامیابی کے لئے بھوک کبھی ختم نہیں ہوتی۔ 
  گوتم گمبھیر نےاس پر زور دیتے ہوئے کہا کہ ’’ ان کی ہمیشہ زیادہ رن بنانے کی خواہش رہتی ہے اور ان کی یہ بھوک کبھی کم نہیں ہوتی۔ مجھے یقین ہے کہ وہ ہندوستان اور آسٹریلیا کے دورے پر آنے والی سیریز میں بلے سے زیادہ رن بنانے کے خواہشمند ہوں گے۔ انہوں نے کہا کہ ہندوستان ۳؍ میچوں کی گھریلوٹیسٹ سیریز کے لئے تیار ہے جس کے بعد آسٹریلیا کا ایک مشکل دورہ ہوگا۔ وراٹ کا تجربہ اور ٹیم کے لئے ان کی لگن اہم ثابت ہوگی۔ وہ اس وقت اچھے فارم کی تلاش میں بھی ہیں. خیال رہے کہ وراٹ کوہلی نے اپنے ٹیسٹ کریئر میں اب تک۱۱۴؍ میچ کھیلے ہیں اور۸۸۷۱؍ رن بنائے ہیں جس میں ۲۹؍ سنچریاں اور ۷؍ ڈبل سنچریاں شامل ہیں. انہیں ۹۰۰۰؍ رن کا ہندسہ عبور کرنے کیلئے ۱۴۰؍ رن درکار ہیں.