دھرم شالہ کا موسم اس وقت بہت خراب ہے اور کچھ دن اور ایسا ہی رہ سکتا ہے۔ ۵؍ ویں ٹیسٹ میچ کے پہلے اور آخری دن بارش کا قوی امکان ہے۔

ہندوستان اور انگلینڈ کے درمیان ۵؍ ٹیسٹ میچوں کی سیریز کا۵؍ واں اور آخری میچ۷؍ سے۱۱؍ مارچ ۲۰۲۴ء تک دھرم شالہ میں کھیلا جائے گا۔ ٹیم انڈیا کو فی الحال سیریز میں ۱۔ ۳؍ کی ناقابل تسخیر برتری حاصل ہے۔ ہندوستانی ٹیم یہ آخری میچ جیت کر سیریز۱۔ ۴؍ سے ختم کرنا چاہے گی تاکہ وہ ورلڈ ٹیسٹ چمپئن شپ ۲۵۔ ۲۰۲۳ء ​​کے پوائنٹس ٹیبل میں سرفہرست رہے۔ سب سے بڑا سوال یہ ہے کہ دھرم شالہ میں سرد اور تیز ہوا کے موسم میں پچ کیسی ہوگی۔ کیا اس میچ میں تیز گیند باز تباہی مچاتے ہوئے نظر آئیں گے یا اسپنرس اپنا جادو چلائیں گے؟ 
ہندوستان اور انگلینڈ کے درمیان آخری میچ دھرم شالہ کے ایچ پی سی اے کرکٹ اسٹیڈیم میں سینٹر وکٹ پر کھیلا جائے گا۔ خیال کیا جا رہا تھا کہ تیز ہواؤں کے درمیان سرد موسم میں کھیلے جانے والے اس میچ میں پچ تیز گیند بازوں کو فائدہ پہنچائے گی۔ تاہم اب خبریں آرہی ہیں کہ دھرم شالہ میں بھی اسپنرس کا دبدبہ دیکھا جا سکتا ہے۔ دراصل دھرم شالہ کا موسم اس وقت بہت خراب ہے اور کچھ دن مزید ایسا ہی رہ سکتا ہے۔ اس میچ کے پہلے اور آخری دن بارش کا قوی امکان ہے۔ اس سے بچنے کیلئے رینک ٹرنر پچ بنائی جا سکتی ہے تاکہ میچ کو جلد ختم کیا جا سکے۔ انڈین ایکسپریس کی ایک رپورٹ کے مطابق کیوریٹر نے بے موسم بارش کی وجہ سے پچ پر زیادہ کام نہیں کیا ہے۔ خیال کیا جا رہا ہے کہ انگلینڈ کی ٹیم کو ایک بار پھر سلو ٹرنر کا سامنا کرنا پڑے گا۔ ٹیم انڈیا نے اسی طرح کی پچ کے ساتھ سیریز میں واپسی کی اور لگاتار ۳؍ ٹیسٹ جیت کر سیریز پر قبضہ کر لیا۔ اس وجہ سے دھولدھر کی پہاڑیوں کے درمیان بنے اس خوبصورت میدان میں اسپنرس سے مدد ملنے کی امید ہے۔ غیر موسمی بارش کی وجہ سے آؤٹ فیلڈ بھی تھوڑا گیلا ہے۔ 
روہت ہیلی کاپٹر سے اسٹیڈیم پہنچے
 ہندوستانی کپتان روہت شرما نے انگلینڈ کے خلاف ۵؍ویں اور آخری ٹیسٹ سے قبل منگل کو دھرم شالہ میں شاندار انٹری کی اور ہیلی کاپٹر کے ذریعے اسٹیڈیم پہنچے۔ ہندوستان نے بین اسٹوکس کی ٹیم کے خلاف ۵؍ ٹیسٹ میچوں کی ہوم سیریز میں ۱۔ ۳؍ کی ناقابل تسخیر برتری حاصل کر لی ہے اور اب اس دورے کا آخری میچ ۷؍ مارچ سے کھیلا جائے گا۔ ہندوستان کے تیز گیند باز جسپریت بمراہ آرام کے بعد آخری ٹیسٹ میں واپس آئیں گے۔ وہ رانچی میں ٹیم کی سیریز میں ۵؍ وکٹوں کی جیت سے باہر رہ گئے تھے۔ انگلینڈ کے خلاف چوتھے ٹیسٹ میں ہندوستان نے مہمان ٹیم کو شکست دے کر اپنے گھر پر لگاتار ۱۷؍ویں ٹیسٹ سیریز جیت لی۔ دھرم شالہ ٹیسٹ کیلئے ہندوستانی ٹیم:روہت شرما (کپتان)، جسپریت بمراہ (نائب کپتان)، یشسوی جیسوال، شبھمن گل، رجت پاٹیدار، سرفراز خان، دھرو جوریل (وکٹ کیپر)، کے ایس بھرت (وکٹ کیپر)، دیودت پڈیکل، آر اشون، رویندر جڈیجا، اکشر پٹیل، کلدیپ یادو، محمد سراج، مکیش کمار اور آکاش دیپ۔ 
آر اشون نے کہا کہ انگلینڈ کے خلاف۲۰۱۲ء کی سیریز میرے لئے اہم تھی
ہندوستان کے سینئر آف اسپنر روی چندرن اشون نے منگل کو کہا کہ انگلینڈ کے خلاف۲۰۱۲ء کی سیریز ان کے کریئر کا اہم موڑ تھا جس نے انہیں اپنی غلطیوں کو درست کرنے میں مدد کی۔ انگلینڈ نے وہ سیریز۱۔ ۲؍ سے جیتی، ۸۵۔ ۱۹۸۴ء کے بعد ہندوستان میں ان کی پہلی سیریز جیتی۔ اشون نے اپنے۱۰۰؍ویں ٹیسٹ میچ سے پہلے پریس کانفرنس میں کہاکہ `انگلینڈ کے خلاف۲۰۱۲ء کی سیریز میرے لئے اہم موڑ تھی۔ مجھے بتایا کہ میں کہاں بہتر کرسکتاہوں۔ اشون انگلینڈ کے خلاف۷؍ مارچ سے دھرم شالہ میں شروع ہونے والے ۵؍ویں اور آخری ٹیسٹ کے ذریعے اپنے کریئر کے۱۰۰؍ ٹیسٹ مکمل کریں گے۔ انہوں نے اس بارے میں کہاکہ `یہ ایک بڑا موقع ہے۔ سفر منزل سے زیادہ خاص رہا ہے۔ میری تیاری میں کوئی تبدیلی نہیں آئی۔ ہمیں ٹیسٹ میچ جیتنا ہے۔ جب ان سے ان کے کریئر کی بہترین کارکردگی کے بارے میں پوچھا گیا تو انہوں نے کہاکہ `میں نے ۱۹۔ ۲۰۱۸ء میں برمنگھم میں اپنے ٹیسٹ کریئر کا بہترین اسپیل کیا تھا۔ اشون، جو حال ہی میں انل کمبلے کے بعد۵۰۰؍ ٹیسٹ وکٹ مکمل کرنے والے دوسرے ہندوستانی گیند باز بن گئے، نے۲۰۱۱ء میں ٹیسٹ کرکٹ میں آغاز کیا تھا۔