ویمنز انڈر ۱۹؍ ورلڈ کپ کے سپرسکس کے میچ میں اسکاٹ لینڈ کو مات دی۔ جی تریشا نے شاندار سنچری بنائی اور ۳؍وکٹ لئے۔

 جی تریشا ( ناٹ آؤٹ ۱۱۰؍رن/۳؍ وکٹ) کی آل راؤنڈ کارکردگی کی بدولت ہندوستانی ٹیم نے خواتین کے انڈر۱۹؍ کے سپر سکس گروپ ون میچ میں اسکاٹ لینڈ کو  ٹی ۲۰؍ کپ میں منگل کو ریکارڈ۱۵۰؍ رن سے شکست دے دی۔
 ۲۰۹؍ رن کے بڑے ہدف کے تعاقب میں آنے والی اسکاٹش ٹیم ہندوستانی بولنگ  اٹیک کے سامنے نہ ٹھہر سکی اور پوری ٹیم ۱۴؍ اوورس میں۵۸؍ رن  پر ڈھیر ہو گئی۔ پیپا کیلی، ایما والسنگھم (۱۲۔۱۲؍رن) اور پیپا سپرول (۱۱؍رن) اسکور کرنے کے بعد آؤٹ ہوئیں۔ نعیمہ شیخ۱۰؍رن بنانے کے بعد ناٹ آؤٹ رہیں۔ ہندوستان کی طرف سے آیوشی شکلا نے ۳؍ اوورس میں ۸؍ رن دے کر ۴؍ وکٹ حاصل کئے۔ جی تریشا نے۲؍ اوورس میں ۶؍ رن (۳؍ وکٹ) دے کر وکٹ حاصل کئے اور ویشنوی شرما نے ۲؍ اوورس میں ۵؍ رن  دے کر ۳؍وکٹ حاصل کئے۔ جی تریشا کو ان کی بہترین کارکردگی پر `پلیئر آف دی میچ سے نوازا گیا۔
  منگل کو   اسکاٹ لینڈ کی خواتین ٹیم نے ٹاس جیت کر پہلے گیند بازی کا فیصلہ کیا۔ ہندوستان کی اوپننگ جوڑی جی کملینی اور جی تریشا بیٹنگ کے لیے آئیں اور پہلے وکٹ کے لیے۱۴۷؍ رن کی شراکت   کی۔ ۱۴؍ ویں اوور میں میسی مسیرا نے جی کملینی کو آؤٹ کر کے اس شراکت کو توڑا۔ جی کملینی نے۴۲؍ گیندوں پر ۹؍ چوکے لگا کر  ۵۱؍رن بنائے۔ جی تریشا نے ۵۹؍ گیندوں پر۱۳؍  چوکے اور۴؍ چھکے مار کرناٹ آؤٹ ۱۱۰؍رن  کی شاندار اننگز کھیلی۔ سانیکا چالکے ۲۹؍ رن بنانے کے بعد ناٹ آؤٹ رہیں۔ ہندوستانی ٹیم نے مقررہ۲۰؍ اوورس میں ایک وکٹ پر۲۰۸؍ رن بنائے۔ اسکاٹ لینڈ کی جانب سے میسی  نے ایک وکٹ حاصل کیا۔ ہندوستان ٹیبل پر ٹاپ پوزیشن پر ہے۔