پہلے یکروزہ میچ میں آسٹریلیا نے ٹیم انڈیا کو ۵؍وکٹوں سے ہرادیا،میگن شٹ نے۵؍وکٹیں حاصل کیں جبکہ جارجیا نے ۴۶؍رن بنائے۔

میگن شٹ (۵؍ وکٹ) کی مہلک گیند بازی کے بعد جارجیا وال (۴۶؍ ناٹ آؤٹ) اور فوبی لیچ فیلڈ (۳۵) کی شاندار بلے بازی کی بدولت آسٹریلیا کی خواتین ٹیم نے جمعرات کو پہلے یکروزہ میچ میں ہندوستانی ٹیم کو ۵؍ وکٹوں سے شکست دے دی۔ 
۱۰۰؍ رنوں کے چھوٹے ہدف کے تعاقب میں آسٹریلیا کی اوپننگ جوڑی جارجیا وال اور فوبی لیچ فیلڈ نے اپنی ٹیم کو اچھا آغاز فراہم کیا اور پہلی وکٹ کیلئے۴۸؍رن جوڑے۔ رینوکا سنگھ نے ساتویں اوور میں فوبی لیچ فیلڈ (۳۵) کو آؤٹ کر کے اس شراکت کو توڑا۔ اس کے بعد نویں اوور میں رینوکا نے ایلیز پیری (ایک)، بیتھ مونی (ایک) کو آؤٹ کرکے ہندوستان کو واپسی کی امید دلائی۔ اینابیل سدرلینڈ (۶) اور ایشلے گارڈنر (۸) کو پریا مشرا نے آؤٹ کیا۔ آسٹریلیا نے ۱۶ء۲؍ اووروں میں ۵؍ وکٹ پر ۱۰۲؍رن بناکر میچ ۵؍ وکٹوں سے جیت لیا۔ میگن شوٹ کو شاندار  گیند بازی پر `پلیئر آف دی میچ کا ایوارڈ دیا گیا۔ ہندوستانی ٹیم کی جانب سے رینوکا سنگھ نے ۳؍ وکٹیں حاصل کیں جبکہ پریا مشرا نے ۲؍ بلے بازوں کو آؤٹ کیا۔
اس سے پہلے ہندوستانی خواتین ٹیم نے ٹاس جیت کر پہلے بلے بازی کا فیصلہ کیا۔ بلے بازی کے لئے آنے والی ہندوستانی ٹیم کی شروعات خراب رہی اور صرف ۱۹؍کے اسکور پر اس کی ۲؍ وکٹیں گر گئیں۔ اسمرتی مندھانا (۸) اور پریا پونیا (۳) رن بنانے کے بعد آؤٹ ہوئیں۔ اس کے بعد ہرلین دیول اور کپتان ہرمن پریت کور نے اننگز کو سنبھالنے کی کوشش کی۔ ۱۲؍ویں اوور میں ایشلے گارڈنر نے ہرلین دیول (۱۹) کو آؤٹ کر کے ہندوستان کو تیسرا جھٹکا دیا۔ اس کے بعد سدرلینڈ نے کپتان ہرمن پریت کور (۱۷) کو آؤٹ کرکے پویلین بھیج دیا۔ جمائمہ روڈریگز (۲۳) اور ریچا گھوش (۱۴) رن بنانے کے بعد آؤٹ ہوئیں۔ باقی ماندہ بلے بازوں میں سے کوئی بھی آسٹریلیائی بولنگ اٹیک کے سامنے نہ رک سکیں۔ ۷؍ بلے باز ڈبل فیگر میں بھی نہ پہنچ سکیں۔پوری ہندوستانی ٹیم ۳۴ء۲؍اوور میں ۱۰۰؍ رن پر آل آؤٹ ہوگئی۔
  آسٹریلیا کی جانب سے میگن شٹ نے ۱۹؍ رن دے کر ۵؍ وکٹیں حاصل کیں۔ کم گارتھ، ایشلے گارڈنر، اینابیل سدرلینڈ اور الانا کنگ نے ایک ایک بلے باز کو آؤٹ کیا۔