آئی پی ایل میں آج چنئی سپرکنگز کی ٹیم راجستھان رائلز سے دو دو ہاتھ کرے گی۔ چنئی کو پچھلے میچ میں بنگلور کے ہاتھوں شکست ملی تھی۔

سست سمجھی جانے والی برساپارا پچ پر چنئی سپر کنگز (سی ایس کے) کے اسپنرس راجستھان رائلز (آر آر) کے بلے بازوں پر دباؤ ڈالنے کی حکمت عملی کے ساتھ اتوار کو میدان پر اترے گی۔ 
آئی پی ایل۲۰۲۵ء کا۱۱؍واں میچ اتوار کی شام ساڑھے ۷؍ بجے یہاں کھیلا جائے گا۔ پچ کے ٹرن لینے کے امکانات کے پیش نظر، سی ایس کے کی اسپن جوڑی نُور احمد اور رویندر جڈیجا خراب فارم سے گزر رہی آر آر کی بیٹنگ لائن اپ کے خلاف کلیدی کردار ادا کر سکتی ہے۔ سی ایس کے نے اس سیزن کا آغاز ملی جلی کارکردگی کے ساتھ کیا ہے۔ اس نے ممبئی انڈینس کے خلاف شاندار کامیابی حاصل کی تھی، لیکن چیپاک میں رائل چیلنجرز بنگلور کے خلاف اسے شرمناک شکست کا سامنا کرنا پڑا۔ 
دوسری جانب، راجستھان رائلز اپنے ابتدائی دونوں میچ ہار کر مشکل میں پھنس چکی ہے اور فارم میں واپسی کی کوشش کر رہی ہے۔ مدمقابل کی بات کی جائے تو سی ایس کے کو۲۹؍ میچوں میں ۱۶؍ فتوحات کے ساتھ معمولی برتری حاصل ہے۔ تاہم، گزشتہ چند برسوں میں آر آر کا دبدبہ رہا ہے، کیونکہ ۲۰۲۰ء سے وہ ۵؍ مرتبہ کی چمپئن ٹیم کے خلاف اپنے پچھلے ۸؍ میں سے ۶؍ میچ جیت چکی ہے۔ نُور احمد، سی ایس کے کے ٹرمپ کارڈ کے طور پر ابھرے ہیں، جنہوں نے اب تک دونوں میچوں میں اہم وکٹ حاصل کئے ہیں۔ ان کی اسپن کے موافق پچ پر کارکردگی دکھانے کی صلاحیت راجستھان کیلئے ایک بڑا خطرہ ثابت ہوسکتی ہے۔ 
ادھر، ہمیشہ قابلِ اعتماد رہنے والے رویندر جڈیجا رن روکنے اور درمیانی اوورس میں شراکت توڑنے میں اہم کردار ادا کریں گے۔ سنجو سیمسن سمیت راجستھان رائلز کے ٹاپ آرڈر کے ساتھ ان کا مقابلہ میچ کو مزید دلچسپ بنا سکتا ہے۔ سی ایس کے کے اسپنر مہیش دکشانانے اگرچہ مایوس کن آغاز کیا ہے، لیکن وہ پاور پلے میں نقصان پہنچانے کی بھرپور صلاحیت رکھتے ہیں۔ گوہاٹی کی سست وکٹ پر ان کی کیرم بال ایک مہلک ہتھیار ثابت ہو سکتی ہے۔ راجستھان رائلز کی قسمت یشسوی جیسوال پر منحصر ہو سکتی ہے، جنہوں نے۲۰۲۳ء سے اب تک ۱۶۰ء۴؍ کے اسٹرائیک ریٹ سے۱۰۶۰؍ رن بنا کر نمایاں بلے باز کی حیثیت حاصل کی ہے۔ پاور پلے میں ان کی جارحانہ شروعات چنئی سپر کنگز کو ابتدا میں ہی دباؤ میں ڈال سکتی ہے۔ سن رائزرس حیدرآباد کے خلاف ۳۷؍ گیندوں پر۶۶؍ رن کی طوفانی اننگز کھیلنے والے کپتان سنجو سیمسن ایک بار پھر ٹیم کی قیادت کرنے کیلئے تیار ہوں گے۔ 
سی ایس کے کیلئے راچن رویندر نے ممبئی انڈینس کے خلاف۶۵؍ رن کی میچ وننگ اننگز کھیل کر اپنی کلاس پہلے ہی ثابت کر دی ہے اور وہ ٹاپ آرڈر میں ایک اہم کھلاڑی ہوں گے۔ تاہم، سی ایس کے کے مڈل آرڈر کی غیر مستقل مزاجی ایک تشویش کا باعث ہے۔