گزشتہ میچ میں کولکاتا کو یکطرفہ مقابلہ میں شکست دینے کے بعد ممبئی کے کھلاڑی پُرجوش، لکھنؤ سپر جائنٹس آئی پی ایل میں ممبئی کیخلاف اپنا دبدبہ برقرار رکھنے کی کوشش کرےگی۔

کولکاتا نائٹ رائیڈرز (کے کے آر) کے خلاف شاندار جیت کے بعد ممبئی انڈینس جمعہ کو نئے اعتماد اور جوش کے ساتھ لکھنؤ سپر جائنٹس (ایل ایس جی) کے خلاف آئی پی ایل ۲۰۲۵ء کے ۱۶؍ویں میچ میں اترے گی۔ 
واضح رہے کہ گزشتہ میچ میں ممبئی کے گیندبازوں نے کے کے آرکو صرف ۱۱۶؍رنوں پر ڈھیر کردیاتھا جس کے بعد ریان رکیلٹن کی ناٹ آؤٹ ۶۲؍ رنوں کے ساتھ سوریہ کمار یادو کے ۹؍ گیندوں پر ۲۷؍رنوں کی دھماکہ خیز اننگز سے آسانی کے ساتھ ہدف کو حاصل کرلیا تھا۔ اس میچ میں نئے کھلاڑی اشونی کمار نے ۴؍ وکٹیں لے کر متاثر کیا جبکہ دیپک چاہر اور ٹرینٹ بولٹ پاور پلے میں مؤثر رہے۔ اس کے علاوہ ماضی کے ریکارڈ سے قطع نظر، ممبئی انڈینس ایل ایس جی کو چیلنج کرنے کے لئے اچھی پوزیشن میں ہے۔ 
لکھنؤ نے ممبئی کے خلاف۶؍ میں سے ۵؍ میچ جیت کر آئی پی ایل میں برتری حاصل کی ہے۔ تاہم کولکاتا کے خلاف ممبئی انڈینس کی حالیہ جیت سے ایل ایس جی کو سنبھل کررہنا ہوگا۔ نکولس پورن نے ایل ایس جی کیلئے اب تک شاندار کارکردگی کا مظاہرہ کیا ہے۔ انہوں نے گزشتہ ۳؍ میچوں میں ۲۲۰؍کے اسٹرائیک ریٹ سے ۱۸۹؍رن بنائے ہیں۔ اس میچ میں بھی ان کی کارکردگی پر سب کی نظریں ہوں گی۔ 
ایل ایس جی اپنے گھر یلو میدان پر آخری میچ میں پنجاب کنگز کے خلاف ۸؍ وکٹوں کی شکست سے آگے بڑھنا چاہے گی۔ مچل مارش اور پورن نے بلے بازی کا بار اٹھایا ہے اور ان کی ناکامی اکثر ٹیم کی کمزوریوں کو بے نقاب کرتی ہے۔ کپتان رشبھ پنت کی خراب فارم تشویش کا باعث بنی ہوئی ہے جبکہ آیوش بدونی اور عبدالصمد نے نیچے آرڈر میں اچھی کارکردگی کا مظاہرہ کیا ہے۔ 
بولنگ کے شعبے میں شاردل ٹھاکر نے ۳؍ میچوں میں ۶؍ وکٹیں ضرور حاصل کی ہیں لیکن وہ مہنگے ثابت ہوئے ہیں اور انہوں نے ۲۲ء۱۰؍ کے اکانومی ریٹ سے رن دئیے ہیں۔ آکاش دیپ کی واپسی سے اٹیک کو تقویت ملنے کی امید ہے جبکہ لیگ اسپنر روی بشنوئی اپنی اب تک کی مایوس کن کارکردگی کو بہتر بنانے کے خواہشمند ہوں گے۔ 
وہیں چاہر اور بولٹ کی قیادت میں ممبئی کا بولنگ اٹیک پاور پلے میں مؤثر رہا ہے۔ ڈیبیو کرنے والے اشون نے آخری گیم میں ۴؍ وکٹ لے کر متاثر کیا اور وہ دوبارہ اہم کردار ادا کر سکتے ہیں۔ مچل سینٹنر کا تجربہ درمیانی اووروں میں اہم ہو گا جبکہ نوجوان تیز گیند باز وگنیش پوتھر کو کامیابی کے لئے بلایا جاسکتا ہے۔ 
بھارت رتن شری اٹل بہاری واجپائی ایکانا اسٹیڈیم کی پچ متوازن ہونے کی امید ہے، جو بلے بازوں اور گیند بازوں دونوں کی مدد کرے گی۔ اوس کی وجہ سے دوسری اننگز میں ہدف کا تعاقب کرنا بہتر آپشن ہو سکتا ہے۔ اس مقام پر آئی پی ایل کی تاریخ میں سب سے زیادہ کامیاب ہدف ۳؍ وکٹ پر ۱۹۹؍رن ہے، جو راجستھان رائلز نے گزشتہ سیزن میں ایل ایس جی کے خلاف حاصل کیا تھا۔ 
مجموعی طور پر دونوں ٹیمیں مستقل مزاجی کی تلاش میں ہیں اس لئے میچ سنسنی خیز ہونے کی امید ہے۔ ایل ایس جی نے پہلے ممبئی انڈینس پر دبدبہ بنایا ہے لیکن مہمان ٹیم کی حالیہ واپسی انہیں میچ میں تھوڑا پسندیدہ بناتی ہے۔