بی سی سی آئی کے نائب صدر راجیو شکلا نے اطلاع دی ہےکہ آئی پی ایل۲۰۲۵ء کے سیزن کا آغاز۲۳؍ مارچ سے ہوگا۔ آئی پی ایل کا حتمی شیڈول ۱۸؍ جنوری کو ہونے والی جنرل باڈی میٹنگ میں طے کیا جائے گا۔

آئی پی ایل ۲۰۲۵ء کے ۱۸؍ ویں سیزن کے حوالے سے ایک بڑی خبر سامنے آ ئی ہے۔ دراصل آئی پی ایل کے اگلے سیزن کا فیصلہ بی سی سی آئی کی خصوصی جنرل میٹنگ (اے جی ایم) میں لیا گیا ہے۔ بورڈ آف کنٹرول فار کرکٹ ان انڈیا (بی سی سی آئی) کے نائب صدر راجیو شکلا نے اتوار (۱۲؍ جنوری) کو اطلاع دی کہ آئی پی ایل ۲۰۲۵ء کے سیزن کا آغاز۲۳؍ مارچ سے ہوگا۔ حالانکہ مکمل شیڈول جاری نہیں کیا گیا ہے اور نہ ہی اس بات کی جانکاری دی گئی ہے کہ سیزن کا پہلا میچ کن۲؍ ٹیموں کے درمیان کھیلا جائے گا۔ راجیو شکلا نے نامہ نگاروں سے گفتگو کرتے ہوئے کہا کہ میٹنگ میں ایک ہی بڑا ایشو تھا اور وہ تھا خزانچی اور سیکریٹری کا انتخاب۔ راجیو شکلا نے مزید کہا کہ آئی پی ایل کمشنر کی تقرری بھی ایک سال کیلئے کر دی گئی ہے۔ آئی پی ایل ۲۰۲۵ء کی شروعات ۲۳؍مارچ سے ہوگی جبکہ اس کا فائنل۲۵؍ مئی کو کھیلا جائے گا۔ ساتھ ہی میٹنگ میں ویمنز پریمئر لیگ (ڈبلیو پی ایل) کے وینیو بھی طے کر دیئے گئے ہیں جس کا جلد ہی اعلان کر دیا جائے گا۔ 
واضح رہے کہ گزشتہ سال یعنی ۲۰۲۴ءمیں آئی پی ایل سیزن کی شروعات۲۳؍ مارچ سے ہوئی تھی اور سیزن کا پہلا میچ آر سی بی اور سی ایس کے درمیان کھیلا گیا تھا۔ وہیں فائنل۲۶؍ مئی کو کے کے آر اور حیدرآباد کے درمیان کھیلا گیا تھا۔ کے کے آر کی ٹیم فائنل میں جیت درج کر تیسری بار چمپئن بنی تھی۔ قابل ذکر ہے کہ چمپئن ٹرافی۲۰۲۵ءکیلئے ابھی تک ہندوستانی ٹیم کا اعلان نہیں کیا گیا ہے جبکہ انگلینڈ، نیوزی لینڈ اور بنگلہ دیش نے۱۵؍ رکنی ٹیم کا اعلان کر دیا ہے۔ حالیہ دنوں میں اس تعلق سے ایک خبر سامنے آئی تھی کہ بی سی سی آئی نے ٹیم کے انتخاب کیلئے آئی سی سی سے مزید وقت مانگا ہے۔ ایسے میں ایک بڑا سوال تھا کہ ٹیم انڈیا کا انتخاب کب ہوگا اس پر بھی راجیو شکلا نے ایک بڑا اپ ڈیٹ دیا ہے۔ انہوں نے نامہ نگاروں سے بات کرتے ہوئے کہا کہ ۱۸؍یا۱۹؍ جنوری کو سلیکشن کمیٹی کی میٹنگ منعقد ہوگی۔ اس کے بعد ہی ہندوستانی ٹیم کا اعلان ہو پائے گا۔ 
آئی پی ایل ۲۰۲۵ء: میچوں کی تعداد
آئی پی ایل۲۰۲۵ء میں ایک بار پھر ۷۴؍ میچ ہوں گے، جیسا کہ۲۰۲۳ء اور۲۰۲۴ء کے سیزن میں دیکھا گیا ہے۔ اس سے قبل یہ اطلاع دی گئی تھی کہ آئی پی ایل۲۰۲۵ء اور۲۰۲۶ء کے سیزن میں ۸۴؍میچ ہوں گے، جبکہ آئی پی ایل۲۰۲۷ء کے سیزن میں ۹۴؍ میچوں کی میزبانی کرے گا لیکن بی سی سی آئی میچوں کی تعداد بڑھا کر کھلاڑیوں پر کام کا بوجھ بڑھانے کے موڈ میں نہیں ہے اور کم از کم ایک اور سیزن کیلئے پرانے فارمیٹ پر قائم ہے۔ 
آئی پی ایل ۲۰۲۵ء کا شیڈول
بی سی سی آئی کی جانب سے ۱۸؍ جنوری کو جنرل باڈی کا اجلاس منعقد ہوگا جس میں آئی پی ایل۲۰۲۵ء اور ڈبلیو پی ایل۲۰۲۵ء کا باضابطہ شیڈول طے کیا جائے گا۔ شائقین توقع کر سکتے ہیں کہ بی سی سی آئی جنوری ۲۰۲۵ءکے آخر تک مکمل شیڈول کا اعلان کر دے گا۔