کرٹس کیمفر کی آل راؤنڈ کارکردگی۔ کپتان پال اسٹرلنگ نے بھی ۸۹؍ رن بنائے۔ سیریز میں برابری حاصل کرلی

 کرٹس کیمفر (۳؍ وکٹ اور ۶۳؍ رن) کی آل راؤنڈر اور کپتان پال اسٹرلنگ  ۸۹؍ رن  کی شاندار بلے بازی کی بدولت آئرلینڈ نے اتوار کو دوسرے ایک روزہ میچ میں ۸؍ گیندیں باقی رہتے ہوئے۲۴۹؍ رن بناکر زمبابوے کو ۶؍ وکٹوں سے شکست دے دی ہے، اس کے ساتھ ہی آئرلینڈ نے ۳؍ میچوں کی سیریز ۱۔۱؍ سے برابر کر لی ہے۔
 زمبابوے کے۲۴۵؍ رن   کے جواب میں بلے بازی کرنے اتری  آئرلینڈ کا آغاز اچھا نہیں تھا اور اس نے چھٹے اوور میں اینڈی بالبرنی (۱۱؍رن) کا وکٹ گنوادیا۔ اس کے بعد بلے بازی کرنے آئے کرٹس کیمفر نے کپتان پال اسٹرلنگ کے ساتھ اننگز کو سنبھالا۔ دونوں بلے بازوں کے درمیان دوسرے وکٹ کیلئے ۱۴۴؍ رن کی شراکت ہوئی۔۳۴؍ویں اوور میں ٹریور گوانڈو نے کرٹس کیمفر کو آؤٹ کر کے اس شراکت کو توڑا۔ کرٹس کیمفر نے۹۴؍ گیندوں پر ۳؍ چوکوں اور ایک چھکے کی مدد سے۶۳؍  رن بنائے۔ اس کے بعد ہیری ٹیکٹر ۷؍ رن بناکر آؤٹ ہوئے۔ ۴۰؍ویں اوور میں رچرڈ اینگاروا نے سنچری کی جانب بڑھ رہے کپتان پال اسٹرلنگ کو آؤٹ کر کے زمبابوے کو چوتھی کامیابی دلائی۔ پال اسٹرلنگ نے ۱۰۲؍ گیندوں پر ۸؍ چوکوں اور ۲؍ چھکوں کی مدد سے  ۸۹؍رن بنائے۔ لورکن ٹکر (ناٹ آؤٹ۳۶؍رن) اور جارج ڈوکریل ( ناٹ آؤٹ۲۰؍رن ) نے تحمل سے بلے بازی کی اور۴۸ء۴؍ اوورس میں۲۴۹؍ رن  بنا کر اپنی ٹیم کو ۶؍ وکٹ سے  فاتح بنایا۔ لورکن ٹکر نے ٹیم کیلئے  وننگ چوکا لگایا۔ زمبابوے کی جانب سے ٹریور گوانڈو نے ۲؍ وکٹ لئے۔ بلیسنگ مزاربانی اور رچرڈ اینگاروا نے ایک ایک بلے باز کو آؤٹ کیا۔
 اس سے قبل آج یہاں ٹاس جیت کر آئرلینڈ نے گیندبازی کرنے کا فیصلہ کیا۔ بلے بازی کرنے اتری برائن بینیٹ اور بین کرن کی اوپننگ جوڑی نے پہلے وکٹ کیلئے ۳۸؍ رن جوڑے۔ ساتویں اوور میں مارک ایڈیئر نے برائن بینیٹ(۳۰؍رن)کو آؤٹ کرکے آئرلینڈ کو پہلی کامیابی دلائی۔ اس کے بعد جوش لٹل نے کپتان کریگ ارون  (۴؍رن) کو بولڈ کر کے زمبابوے کو دوسرا جھٹکا دیا۔ بین کرن (۱۸) کو میک برائن نے بولڈ کیا۔ اس کے بعد ویسلے مادھویرے اور سکندر رضا نے اننگز کو سنبھالا۔ دونوں بلے بازوں کے درمیان چوتھے وکٹ کیلئے ۷۴؍ رن  کی شراکت ہوئی۔۳۳؍ویں اوور میں کرٹس کیمفر نے  ویسلے کو آؤٹ کر کے اس شراکت کو توڑا۔  ویسلے ۷۰؍ گیندوں پر ۶؍ چوکوں کی مدد سے۶۰؍رن  بنائے۔ جوناتھن کیمپ بیل (۲؍رن) اور تادیواناشے  مارومانی (صفر) کو بھی کیمفر نے آؤٹ کیا۔ آئرلینڈ کے گیندبازی حملے کے سامنے زمبابوے کا کوئی بھی بلے باز زیادہ دیر ٹھہرنہ سکا۔ زمبابوے کا ۷؍واں وکٹ سکندر رضا کی صورت میں گرا۔ انہیں مارک ایڈیئر نے آؤٹ کیا۔ سکندر رضا نے۷۵؍ گیندوں پر ۵؍ چوکوں کی مدد سے ۵۸؍ رن  بنائے۔ بلیسنگ  (صفر) اور ویلنگٹن مساکدزا ۳۵؍رن بنانے کے بعد آؤٹ ہوئے۔۴۹؍ویں اوور میں ٹریور گوانڈو ۲؍رن بناکر آؤٹ ہوئے۔ انہیں  مارک ایڈیئر نے بولڈ کیا۔ اس کے ساتھ ہی آئرلینڈ نے زمبابوے کو۴۹؍ اوورس میں۲۴۵؍ رن  پر ڈھیر کردیا۔