ہندوستان کے سابق کوچ روی شاستری کا ماننا ہے کہ تجربے کے باوجود ہندوستانی ٹیم کے نئے ہیڈ کوچ گوتم گمبھیر کیلئے اپنے کھلاڑیوں کو سمجھنا ایک بڑا چیلنج ہوگا۔ 

ہندوستان کے سابق کوچ روی شاستری کا ماننا ہے کہ تجربے کے باوجود ہندوستانی ٹیم کے نئے ہیڈ کوچ گوتم گمبھیر کیلئے اپنےکھلاڑیوں کو سمجھنا ایک بڑا چیلنج ہوگا۔ انٹرنیشنل کرکٹ کونسل (آئی سی سی) کے ریویو پروگرام کے دوران شاستری نے کہاکہ کھلاڑیوں کا نظم و نسق کوچ کا بنیادی کام ہے۔ یہ دیکھنا دلچسپ ہوگا کہ وہ یہ کیسے کرتے ہیں۔ ان کے پاس یہ سب کرنے کیلئے کافی تجربہ اور وسائل ہیں۔ وہ جلد از جلد کھلاڑیوں کو سمجھنے کی کوشش کریں گے کہ ان میں کیا خاص بات ہے، وہ کس طرح کے انسان ہیں، ان کی شخصیت اور فطرت کیسی ہے۔ انسان کو سمجھنے کے بہت سے معیارات ہوتے ہیں۔ انہوں نے کہاکہ ’’وہ ہم عصر ہیں اور ان کا انڈین پریمیر لیگ (آئی پی ایل) کا آخری سیزن بحیثیت مینٹور اچھا گزرا۔ ان کی عمر بھی ٹھیک ہے اور وہ ابھی جوان ہیں۔ وہ نئی حکمت عملی کے ساتھ ٹیم میں آئیں گے۔ اس کے علاوہ وہ زیادہ تر کھلاڑیوں کو قریب سے جانتے ہیں کیونکہ وہ ایک کھلاڑی اور مینٹور کے طور پر آئی پی ایل کی مختلف ٹیموں کا حصہ رہے ہیں۔ مجموعی طور پر یہ ایک بالکل نیا قدم ہے۔