آئی سی سی ویمنز کرکٹ ورلڈ کپ۲۰۲۵ء کے مدنظر جنوبی افریقہ نے سری لنکا میں ہونے والے آئندہ ون ڈے میچوں کیلئے ماریزان کاپ کو آرام دیا ہے

 آئی سی سی ویمنز کرکٹ ورلڈ کپ۲۰۲۵ء کے مدنظر جنوبی افریقہ نے سری لنکا میں ہونے والے آئندہ ون ڈے میچوں کیلئے  ماریزان کاپ کو آرام دیا ہے۔ جنوبی افریقہ نے اس ماہ کے آخر میں سری لنکا اورہندوستان کے خلاف ہونے والی سہ رخی سیریز سے پہلے ٹریننگ کیمپ کے لئے  جمعہ کو۲۰؍ رکنی ویمنز ٹیم کا اعلان کیا۔ ۶؍ سے ۱۴؍اپریل تک ہونے والے ایک ہفتے کے ٹریننگ کیمپ میں ۳؍ انکیپڈ کھلاڑیوں وکٹ کیپر بلے باز کرابو میسو، آل راؤنڈر میان اسمتھ اور اسپنر سیشنی نائیڈوشامل ہوں گے۔  اس دوران، تجربہ کار آل راؤنڈر ماریزان کاپ  ٹریننگ کیمپ کے ساتھ ساتھ سری لنکا میں ہونے والی آئندہ  سہ رخی  سیریز سے بھی باہر رہیں گی۔ جنوبی افریقہ کو مسلسل آئی سی سی ٹورنامنٹس کے فائنل (۲۰۲۳ء اور۲۰۲۴ء ویمنز ٹی  ۲۰؍ ورلڈ کپ) تک پہنچانے میں اہم کردار ادا کرنے والی کاپ کو اگلے دوروں اور امسال کے آخر میں ہندوستان میں ہونے والے ویمنز کرکٹ ورلڈ کپ کی تیاری کیلئے آرام دیا گیا ہے۔
 خواتین ٹیم کی ہیڈ کوچ منڈلا ماشمبی نے ٹریننگ کیمپ کے مقاصد کے بارے میں تفصیل سے بتایا۔ سی ایس اے نے ان کے حوالے سے کہا کہ ’’ہم وکٹ کے درمیان دوڑنے، روٹیشنل گیم کھیلنے پر بہت زیادہ توجہ مرکوز کریں گے، جس سے بیداری بڑھانے میں مدد ملے گی۔‘‘  ماشمبی نے کہاکہ ’’میں نئے کھلاڑیوں کو ہمارے ماحول میں دیکھنے کے لیے پرجوش ہوں  اور مجھے پورا یقین ہے کہ ٹیم کے باقی اراکین ان کا خیال رکھیں گے اور انہیں یہ محسوس کروائیں گے کہ وہ یہاں اس لئے ہیں کیونکہ یہ پروٹیز ویمنز کرکٹ کا مستقبل ہیں۔ یہ ضروری ہے کہ ہم انہیں پہلے گھر جیسا محسوس کروائیں۔‘‘