نیوزی لینڈ نے پاکستان کے خلاف ٹی ۲۰؍ سیریز کیلئے بریسویل کو کپتان بنایا۔ ٹی ۲۰؍ ورلڈ کپ کیلئے نیوزی لینڈ کیلئے یہ سیریز اہم ہے

نیوزی لینڈ نے اتوار سے پاکستان کے خلاف شروع ہونے والی ۵؍ میچوں کی ٹی۲۰؍ سیریز کیلئے  مائیکل بریسویل کو ٹیم کا کپتان مقرر کیا ہے۔ نیوزی لینڈ کے سلیکٹر سیم ویلز نے کہا کہ  اگلے سال ہندوستان اور سری لنکا میں ہونے والے آئی سی سی ٹی ۲۰؍ ورلڈ کپ کیلئے  نیوزی لینڈ کی تیاریوں کے پیش نظر یہ سیریز اہم ہے۔ انہوں نے کہا کہ نیوزی لینڈ کو آئی سی سی چمپئن  ٹرافی کے فائنل تک پہنچانے میں اہم رول ادا کرنے والے بریسویل وائٹ بال کے باقاعدہ کپتان مشیل سینٹنر کی جگہ لیں گے۔ بریسویل کیلئے  گھریلو سرزمین پر نیوزی لینڈ کی قیادت کرنے کا یہ پہلا موقع ہے، وہ اس سے قبل پاکستان کے دورے پر وائٹ بال ٹیم کی کپتانی کر چکے ہیں۔ ایش سوڈھی کی ٹیم میں واپسی ہوئی ہے۔ فاسٹ بالر کائل جیمیسن اور ول او رورکے پہلے ۳؍ میچوں کیلئے دستیاب ہوں گے  جبکہ میٹ ہینری فٹنیس اسسمنٹ کے بعد آخری ۲؍ میچ کھیلیں گے۔
 ٹیم کا کپتان بنائے جانے پر بریسویل نے کہا ’’ قومی ٹیم کی کپتانی کرنا بہت بڑا اعزاز اور خوش قسمتی ہے۔ میں نے گزشتہ سال پاکستان میں ٹیم کی کپتانی کرتے ہوئے بہت لطف اٹھایا اور اس سیریز کیلئے  ان میں سے بہت سے کھلاڑیوں کا ٹیم میں واپس آنا بہت اچھا ہے۔ مشیل سینٹنر نے شاندار کام کیا ہے اور میری توجہ ان کے اچھے کام کو آگے بڑھانے پر مرکوز رہے گی، ساتھ ہی ٹیم کیلئے  کارکردگی کا مظاہرہ کرنے کیلئے  ایک مثبت ماحول تیار کرنا ہوگا۔‘‘
  پاکستان کے خلاف گھریلو ٹی ۲۰؍ سیریز کیلئے  نیوزی لینڈ کی ٹیم اس طرح ہے:  مائیکل بریسویل (کپتان)، فن ایلن، مارک چیپ مین، جیکب ڈفی، جیک فولکس (۲؍میچ کیلئے ) ، میٹ ہینری (۲؍میچ کیلئے)، کائل جیمیسن (۳؍میچ کیلئے)، ڈیرل مشیل، جمی نیشام، ول او رورکے (۳؍میچ کیلئے)، ٹم رابنسن، بین سیئرز، ٹم سیفرٹ، ایش سوڈھی۔
 پہلا ٹی ۲۰؍ میچ۱۶؍ مارچ بروز اتوار کرائسٹ چرچ کے ہیگلے اوول میں، دوسرا میچ۱۸؍ مارچ بروز منگل ڈونیڈن یونیورسٹی آف اوٹاگو اوول میں، تیسرا میچ ۲۱؍ مارچ بروز جمعہ آکلینڈ ایڈن پارک، چوتھا میچ ۲۳؍ مارچ بروز اتوار تورنگا بے اوول میں اور پانچواں ٹی ۲۰؍ میچ۲۵؍ مارچ بدھ کو ویلنگٹن کے اسکائی اسٹیڈیم میں کھیلا جائے گا۔