انگلینڈ کیخلاف ہونے والی سیریز کیلئے محمد سمیع نے تیاری کی۔تیز گیندباز نے شائقین کوسرخرو ہونے کا موقع فراہم کرنےکا بھی وعدہ کیا۔

تیز گیندباز محمد سمیع نے انگلینڈ کے خلاف ٹی ۲۰؍ سیریز سے قبل مشہور ایڈن گارڈنس میں ہندوستانی ٹیم کے ساتھ ٹریننگ شروع کر دی۔ جسپریت بمراہ کو اگلے ۵؍ میچوں کی ٹی ۲۰؍ سیریز کے لیے اسکواڈ سے باہر کئے جانے کے بعد  سمیع  مین ان بلیو کی گیندبازی کے حملے کی قیادت کریں گے۔
 پچھلے سال سمیع  ٹخنے کی سرجری کے بعد بنگال کے ساتھ ڈومیسٹک کرکٹ میں واپس آئے۔اس مسئلے کی وجہ سے  انہیں تقریباً ایک سال تک باہر رہنا پڑا۔ سمیع وجے ہزارے ٹرافی کے لیے بنگال ٹیم کا بھی حصہ تھے۔ سمیع نے مسابقتی کرکٹ میں شاندار واپسی کی، وہ آخری بار۲۰۲۳ء کے ون ڈے ورلڈ کپ کے فائنل میں شامل ہوئے تھے۔ ٹخنے کی سرجری سے گزرنے اور   صحت یاب ہونے کے بعد  انہوں نے نومبر میں مدھیہ پردیش کے خلاف رنجی ٹرافی میچ میں بنگال کے لیے میچ کھیلا۔ اس سے قبل ۱۱؍جنوری کو  سمیع  کو انگلینڈ کے خلاف اگلی ٹی ۲۰؍ انٹرنیشنل سیریز  کے لیے ہندوستانی اسکواڈ میں شامل کیا گیا تھا۔
 بورڈ آف کنٹرول فار کرکٹ ان انڈیا (بی سی اسی آئی ) نے ۳۴؍ سالہ نوجوان کی مین ان بلیو کے ساتھ ٹریک پر واپس آنے کی چند تصاویر شیئر کیں۔ ٹیم انڈیا کے بولنگ کوچ مورنے مورکل چوٹ سے واپسی کے بعد اپنے پہلے پریکٹس سیشن کے دوران سمیع پر گہری نظر رکھے ہوئے تھے۔ دریں اثنا، سمیع نے اپنے آفیشل انسٹاگرام ہینڈل پر جا کر کہا کہ وہ شہریوں کو ایک بار پھر فخریہ لمحہ محسوس کروانے  کے لیے تیار ہیں۔  سمیع  نے انسٹاگرام پر لکھا، `آپ سب کو ایک بار پھر فخر کا احساس  کروانے کے لیے تیار ہیں... اپنی محبت اور حمایت جاری رکھیں۔ 
 واضح رہے کہ ۵؍ میچوں کی ٹی ۲۰؍ انٹرنیشنل  سیریز کا آغاز۲۲؍ جنوری کو کولکاتا  میں ہوگا۔ دوسرا اور تیسرا میچ بالترتیب  ۲۵؍ اور۲۸؍ جنوری ۲۰۲۵ءکو چنئی اور راجکوٹ میں کھیلا جائے گا۔ سیریز کا چوتھا میچ ۳۱؍ جنوری کو پونے میں کھیلا جائے گا۔ ممبئی۲؍ فروری کو ٹی ۲۰؍ سیریز کے آخری میچ کی میزبانی کرے گا۔ انگلینڈ کے خلاف ٹی ۲۰؍ سیریز کیلئے  ہندوستان کا سکواڈ: سوریہ کمار یادو (کپتان)، سنجو سیمسن (وکٹ کیپر)، ابھیشیک شرما، تلک ورما، ہاردک پانڈیا، رِنکو سنگھ، نتیش کمار ریڈی، اکشر پٹیل (نائب کپتان)، ہرشیت رانا، ارشدیپ سنگھ، محمد سمیع، ورون چکرورتی، روی بشنوئی ، واشنگٹن سندر، دھرو جریل (وکٹ کیپر)۔

محمد سمیع کی واپسی ٹیم کے لیے بہت مثبت بات ہے: اکشر پٹیل 
ٹیم انڈیا کے آل راؤنڈر اکشرپٹیل  نے ۱۹؍نومبر۲۰۲۳ء کو ون ڈے ورلڈ کپ فائنل کے بعد پہلی بار تجربہ کار تیز گیند باز محمد سمیع  کی قومی ٹیم میں واپسی کا بھی خیر مقدم کیا۔  سمیع ٹخنے کی سرجری سے صحت یاب ہونے کے بعد گھٹنے کے مسائل میں مبتلا تھے۔   انہوں نے کہاکہ  `یہ ٹیم کے لیے بہت مثبت بات ہے۔ آخری بار وہ (سمیع) ون ڈے ورلڈ کپ کے فائنل میں کھیلا تھا اور صحت یاب ہونے کے بعد انہوں نے سید مشتاق علی اور وجے ہزارے دونوں ٹورنامنٹس میں اچھی کارکردگی کا مظاہرہ کیا ہے۔ جب بھی کوئی سینئر کھلاڑی  لوٹتا ہے تو اس سے ٹیم کو زبردست حوصلہ ملتا ہے۔ ہم سب جانتے ہیں کہ سمیع بھائی کیا کمال کرتے ہیں، چاہے وہ نئی گیند سے ہو یا ڈیتھ اوورس میں۔ ان کی موجودگی، خاص طور پر نئی گیند کے ساتھ، ٹیم کے لیے بہت بڑا فائدہ ہے۔ امید ہے کہ وہ اسی فارم کو جاری رکھیں گے جو انہوں نے ورلڈ کپ میں دکھایا تھا۔ اوپنرس ایسے کھلاڑی ہیں جن کی ہندوستانی ٹی ۲۰؍ لائن اپ میں  جگہ یقینی ہے اور اس کے بعد بیٹنگ آرڈر میں ’بہت سے فلوٹرس‘ ہوں گے۔ نئے نائب کپتان اکشر پٹیل نے پیر کو  یہ بات کہی ۔ ہندوستان بدھ کو ایڈن گارڈنس میں انگلینڈ کے خلاف ۵؍ میچوں کی ٹی ۲۰؍ انٹر نیشنل  سیریز سے اپنی مہم کا آغاز کرے گا۔ جب ان سے بیٹنگ آرڈر میں اتار چڑھاؤ کے بارے میں پوچھا گیا تو ٹیم انڈیا کے آل راؤنڈر نے جواب دیاکہ ’’یہ صرف میرے بارے میں نہیں ہے۔ یہ ٹیم میں ہر ایک پر نافذ ہوتا ہے۔۲۰۲۴ء کے آغاز سے ہی  ہم نے ایک فکس اوپننگ سلاٹ کا فیصلہ کیا تھا اور نمبر۳؍ سے لے کر نمبر ۷؍ تک ہر کسی کو صورتحال، کمبی نیشن اور میچ  کے لحاظ سے لچکدار رہنے کو کہا گیا ہے۔اکشر، جو اب سیریز کے لیے ٹیم مینجمنٹ کا حصہ ہیں۔