مالی پریشانی کا شکار سابق کرکٹ کھلاڑی کے سابقہ رویہ کی وجہ سے ایم سی اے انہیں کوئی ذمہ داری دینے سے ہچکچا رہا ہے

ہندوستان کے سابق کرکٹ کھلاڑی ونود کامبلی سے متعلق اس اخبار میں گزشتہ روز خبر شائع ہوئی تھی کہ ان کی مالی حالت ٹھیک نہیں ہے۔ اس کے بعد سوشل میڈیا اور کرکٹ کے مداحوں نے کافی رد عمل کا اظہار کیا ہے۔دریں اثنا ممبئی کرکٹ اسوسی ایشن(ایم سی اے) نے،جن سے کامبلی نے کرکٹ سے متعلق کوئی کام فراہم کرنے کی درخواست کی ہے، کسی قسم کا کام دینے سے متعلق کوئی ردعمل ظاہر نہیں کیا ہے۔واضح رہے کہ ونود کامبلی ایم سی اے کی کرکٹ امپرومنٹ کمیٹی(سی آئی سی) کی ۳؍رکنی کمیٹی کے رکن ضرور ہیں لیکن یہ ایک اعزازی کام ہے۔ ایم سی اے کے کئی عہدیداران اور افسران سے بات چیت کرنے پر ایسا لگتا ہے کہ اسوسی ایشن ونود کامبلی کو کسی بھی حیثیت سے ایم سی اے میںشامل کرنے پر محتاط رویہ اختیار کر رہا ہے۔ ایم سی اے کے ذرائع نے بتایا کہ ’’۲۰۲۱ء میں ایم سی اے کاونسل کی میٹنگ میں یہ فیصلہ کیا گیا تھا کہ ایک جنرل منیجر(کرکٹ آپریشن) کا عہدہ بنایا جائے اور ونود کامبلی کو مالی مدد فراہم کرنے کیلئے انہیں یہ عہدہ دیا جائے۔لیکن ان کا ایک ویڈیو وائرل ہوا تھا جس میں وہ شراب کے نشے میں نظر آئے۔اس کے بعد ہم نے   انہیں شامل کرنے کا ارادہ بدل دیا۔‘‘  ایک دیگر ذرائع نے بتایا کہ ایم سی اے نے ونود کامبلی کےلئے جتنا ہوسکتا تھا کرنے کی کوشش کی۔’’ہم نے بی کے سی میں واقع کلب میںخاص اجازت لے کرونود کامبلی کو کرکٹ اکیڈمی قائم کرنے کی اجازت دی تھی جہاں وہ رات کے وقت فلڈ لائٹ میں کوچنگ سیشن جاری رکھ سکیں۔ ہم تو انہیں گھر سے کلب تک لانے کیلئے کار بھی بھیجتے تھے تاکہ وہ سی آئی سی کی میٹنگوں میں شرکت کر سکیں لیکن وہ اکثر تاخیر سے آتے تھے  اور فون پر جب ان سے رابطہ کیا جاتا تھا تو وہ  بات بھی نہیں کرتے تھے۔‘‘