اسمرتی مندھانا کی نصف سنچری کی بدولت رائل چیلنجرز بنگلور نے ممبئی انڈینس کو ۱۱؍رن سے شکست دے دی۔ دہلی کی ٹیم ٹیبل پر ٹاپ پر رہی

اسمرتی مندھانا(۵۳؍رن) ، ایلیس پیری (  ناٹ آؤٹ۴۹؍رن/۲؍ وکٹ)، جارجیا ویرہم (  ناٹ آؤٹ۳۱؍رن/ایک وکٹ) اور اسنیہ رانا (۳؍ وکٹ) کی شاندار کارکردگی کی بدولت رائل چیلنجرز بنگلور (آر سی بی) نے منگل کو ویمنز پری ڈبلیو ایم آئی لیگ کے میچ میں ممبئی انڈینس کو۱۱؍ رن  سے شکست دی۔ اس کے ساتھ ہی دہلی کیپٹلس نے پوائنٹس ٹیبل پر ٹاپ پر رہتے ہوئے ٹورنامنٹ کے فائنل میں جگہ بنالی ہے۔ ممبئی انڈینس ایک بار پھر ایلیمینیٹر کھیلے گی اور یہ میچ جمعرات کو کھیلا جائے گا۔ اس گراؤنڈ پر ممبئی کی یہ پہلی شکست ہے۔ 
 ۲۰۰؍رن کے ہدف کے تعاقب میں آنے والی ممبئی انڈینس کی شروعات اچھی نہیں رہی اور۳۸؍ رن  کے اسکور پر اس کے ۲؍ وکٹ گر گئے۔ ہیلی میتھیوز  ۱۹؍رن  اور امیلیا کیر ۹؍رن  بنانے کے بعد آؤٹ ہوئیں۔ دونوں بلے بازوں کو اسنیہ رانا نے آؤٹ کیا۔ نیٹ اسکیور برنٹ نے کپتان ہرمن پریت کور کے ساتھ اننگز کو سنبھالنے کی کوشش کی۔ دونوں بلے بازوں کے درمیان۴۰؍ رن کی شراکت ہوئی۔ کم گارتھ نے۱۱؍ویں اوور میں ہرمن پریت (۲۰؍ رن) کو آؤٹ کرکے اس شراکت کو توڑا۔ امنجوت کور ۱۷؍رن  اور یاستیکا بھاٹیہ۴؍رن بنانے کے بعد آؤٹ ہوئیں۔ نیٹ سکیور برنٹ نے ۳۵؍ گیندوں پر ۹؍ چوکوں اور۲؍ چھکوں کی مدد سے۶۹؍ رن بنائے۔ اس کے ساتھ ہی نیٹ اسکیور برنٹ ڈبلیو پی ایل میں۴۰۰؍ رن بنانے والی پہلی بلے باز بن گئی ہیں۔ ایس سجنا نے آخری اوور میں شاندار بلے بازی کرتے ہوئے اپنی ٹیم کو جیت اور فائنل میں جگہ دلائی لیکن بالآخر ایلس پیری نے انہیں۲۳؍ رن پر آؤٹ کرکے پویلین بھیج دیا۔ ممبئی کی ٹیم مقررہ۲۰؍ اوورس میں ۹؍ وکٹ پر صرف ۱۸۸؍ رن بنا سکی اور میچ۱۱؍ رن  سے ہار گئی۔ آر سی بی کی جانب سے اسنیہ رانا نے ۳؍ وکٹ حاصل کئے۔ ایلیز پیری اور کم گارتھ نے ۲۔۲؍ وکٹ لئے۔ ہیدر گراہم نے ایک بلے باز کو آؤٹ کیا۔
 اس سے پہلے ممبئی انڈینس کی کپتان ہرمن پریت نے ٹاس جیت کر پہلے گیند بازی  کا فیصلہ کیا۔ آر سی بی کیلئے  بلے بازی کیلئے  آتے ہوئے ایس میگھنا اور کپتان اسمرتی مندھانا کی اوپننگ جوڑی نے پہلے وکٹ کیلئے ۴۱؍ رن جوڑے۔ چوتھے اوور میں ہیلی میتھیوز نے ایس میگھنا (۲۶؍رن) کو آؤٹ کرکے اس شراکت کو توڑا۔ اس کے بعد بلے بازی کیلئے  آئی ایلیس پیری نے اسمرتی مندھانا کا خوب ساتھ دیا۔ دونوں بلے بازوں نے جارحانہ بلے بازی کی اور دوسرے  وکٹ کیلئے ۵۹؍ رن جوڑے۔ امیلیا کیر نے ۱۲؍ویں اوور میں اسمرتی مندھانا کو آؤٹ کر کے ممبئی انڈینس کو دوسری کامیابی دلائی۔ اسمرتی مندھانا نے۳۷؍ گیندوں پر ۵۳؍ رن کی نصف سنچری اننگز کھیلی، ۶؍ چوکے اور ۳؍ چھکے لگائے۔ رچا گھوش ۲۲؍ گیندوں پر۳۶؍ رن بنانے کے بعد آؤٹ ہوئیں۔ آخری اوورس میں ایلیس پیری اور جارجیا ویرہم نے طوفانی بیٹنگ کی اور ٹیم کا اسکور۲۰؍ اوورس میں ۳؍ وکٹ پر۱۹۹؍ رن تک پہنچا دیا۔ ایلیس پیری نے۳۸؍ گیندوں میں (ناٹ آؤٹ۴۹؍رن) ۵؍چوکے اور ایک چھکا لگایا  جبکہ جارجیا ویرہم نے ۱۰؍ گیندوں پر۵؍ چوکوں اور ایک چھکے کی مدد سے ۳۱؍ رن  (ناٹ آؤٹ) بنائے۔  ممبئی انڈینس کی جانب سے ہیلی میتھیوز نے ۲؍ اور امیلیا کیر نے ایک وکٹ حاصل کیا۔